Kular u BM ka SBI Ladrymbai ban iatreilang bad ka KSU-EJHDU ban ai jingpynshai sha ki paidbah ban lait na ki riew shim kabu
Khliehriat naiwieng 22: Hadien ba ka Khasi Students Union East Jaiñtia Hills District Unit ka la ioh ïa ki jingujor na ki paidbah kiba la shah pynngop ha kito ki briew kiba thok ha ki kam pisa bad kaba kum kane ka ju jia ruh na ka por sha ka por , na ka liang ka seng hynnin ka sngi ka la leit ban iakynduh ïa u Branch Manager jong ka State Bank of India Ladrymbai Branch
Katkum u kyrwoh khubor, la ong ba ka seng ka la ioh ka jingujor halor ka jing shah thok pisa da bad shah pynngop ha ka kam pisa ha kaba kita kiba shim pisa ki la kular ban ai ka nong shibun tangba da ka jingkheng pisa (investment) kaba barit, kane ka wan lyngba ki Company lane ki online gaming, ki online trading kiba thok, ki bym dei kiba shisha, ka KSU-EJHDU ba la lam khmat da u Samla Pynshai Kupar Dkhar, uba dei u Asst.General Secretary , u Samla rangbah u bah Shaniahskhem Dkhar, uba dei u Finance Secretary bad u samla Shwari Ryngkhlem, ki la ïa kynduh ïa u Branch Manager ka State Bank of India(SBI) Ladrymbai Branch bad kyrpad bad ruh ban iatrei lang bad ka seng da kaba pynlong da ki awareness prokram halor kine ki riew shim kabu kiba ju thok lane ki fraud, ka seng ka kwah ban pynlong ïa ka prokram ai jingpynshai khamtam sha ki khynnah skul, ki khynnah college, ki rangbah, ki longkmie kumjuh khnang ba kin lait na kano kano ka jingshah thok, ba kin lait ruh na kano kano ka jingshah pynbiej ha ki company thok, kino kino ki online Earning apps lane ki briew kiba kular ban pynioh nong shi phew shah na ka jingpynlut kaba tang khyndiat.
La ong ba na ka liang u Branch Manager, State bank of India Ladrymbai branch, u la kular bad pdiang sngewbha ïa kane ka jingtyrwa ka seng bad kular ruh ban iasnoh ktilang bad ka seng ban ai jinghikai bad jingpynshai ïa ki paidbah ban lait na ki briew kiba thok kiba kwah ban bam pisa ei khlem da pynmih syep na ka met lane khlem da ka pyndonkam ia ka jabieng.
Ha kajuh ka por ka KSU East Jaiñtia Hills District, ka kyntu ruh ïa ki paidbah ban long kiba stad bad kiba husiar bha lada kino kino ki jait Company lane ki briew kiba wan ban khroh ïa ki ban kamai da kaba suk.