Nongpoh, Naiwieng 22: U MLA ka Nongpoh u Bah Mayral Born Syiem hynnin ka sngi u la leit ban plie paidbah ïaka iing treikam jong ka ïaidshaphrang Village Organisation haka shnong Lumdieng ba kin ioh ban treikam bad khamtam ban pyntyllun ïaki kam jong ka VO ha katei ka shnong.
Ha katei ka sngi la wan ruh ban sakhi da ka jingdonlang u Bah Balajied Ranee MDC ka Nongpoh, ki nongïalam VO, nongïalam shnong bad kiwei kiwei ki riew rangbah. Ha katei ka juh ka sngi naka liang u MLA, u la aiti ruh da ka song pisa bad tin sop iing sha katei ka VO bad naka liang u MDC u la aiti da ki khiew bad kumjuh ruh ka Work Order.
Haba kren ha katei ka sngi naka liang u MLA u la ai ka jingïaroh ïa katei ka VO kaba la sdang ban kiew shaphrang bad pyrshang ruh ban tei ïaka iing treikam jong ka da ki siej, ba kin ioh ka jaka treikam ban pyntyllun ïaki kam ki jam jong ki, khamtam kum ki VO ki don ka thong ban kyrshan ïaki para longkmie ban ïeng hala ki jong ki kjat.
U la ong ruh ba bunsien ki VO kiba trei shitom bad lyngba ki kam jong ki, ki lah ban ioh ki jingïarap bapher bapher ha kaba kum u MLA u la kyrpad ïaki ba ki dei ban pyni shuwa ki kam lada ki kwah jingïarap bad kyntu ruh ïaki ba kin dang trei shitom haka kam khamtam ban nym don kano kano ka jingbishni pihuiñ bad ba kin dang kiew shaphrang haka kam kaba ki trei bad shakri.
