Pynsngew ka tnad Water Resources ïaka projek ha Pynthorneiñ kaba kot da ki klur tyngka

Jowai, Naiwieng 22: Ka ophis jong u Executive Engineer ka Water Resources (WR) West Jaiñtia Hills District, Jowai mynta ka sngi Balang kala pynlong ïaka jingpynsngew paidbah (Public Hearing) khamtam ïa ki trai jaka bad ki nongrep haki bynta jong ka Pynthorneiñ (Wah Myntdu) halor ka jingthmu ban wanrah ïa ka projek “Flood Management Project” kaba kot da ki klur tyngka ïa kaba yn bei pisa da ka sorkar kmie lyngba ka Ministry jong ka Water Resources.
Ha kane ka sngi ki briew jong ka tnad WR ha ryngkat ka jingdonlang jong u bah Silvester Phanbuh, MCS Extra Assistant Commissioner, ki nongïalam shnong, ki trai jaka bad ki nongrep ha Pynthorñein kiba hap hapoh ki lai tylli ki shnong kata ka Mihmyntdu, Khliehtyrshi bad ka Ladthadlaboh kila wan ban sngap ïa katei ka jingpynsngewthuh paidbah shaphang katei ka Projek da ki ophisar ka tnad WR.
Ïa kane ka projek yn shna kyrpang ïa ki kynroh ha shilynter ka Wah ba tuid ka um ha Pynthorneiñ kata naduh ki bynta ka (Tyrshi Fall) haduh ban da poi ha jingkieng PWD surok NH haka jingjngai kumba 2 kilo miter tam eiei bad ha shi lynter yn don ruh ki jingkieng ïaid kjat ban jam sha shilliang.
Ka jingthmu hi ban shna ïa katei ka ‘Flood Management Project’ ka long shi bynta ban pynduna na ka jingshlei ka um sha ki pynthor kba khamtam haka por Lyiur ba jur u lapbah bad kane kan pynkylluid ïaka rukom tuid jong ka Wah, ïa kane ka ophis WR kala i donkam ban shna ïa katei ka porjek ban lait na ka jingshahktah haka bor mariang.
Ha kane ka sngi naka liang u bah P. Kurbah (Executive Engineer) ka Water Resources uba pynïaid ïaka jingïalang ula mait phang halor kane ka jingthmu ban wanrah ïa ka projek, da kaba ong ba kane ka projek kan ïarap na ka jingslei um kaba ju wan jia manla ka snem.
Ula ong ba ïa kane ka juh ka projek la dep ban pyrshang ban shan haka thaiñ Ialong, kumta la donkam ban ïoh ka shah jingmynjur (NOC) lyngba kane ka jingpynsngew paidbah naduh ki trai jaka ryngkat ka jingsakhi ki nongïalam shnong ban pynïaid noh sha khmat ïa kane ka kam naka bynta ban pynkhreh ïa ka DPR sha ka sorkar kmie.
U SDO ka Water Resources ma Nangtiaki Tariang ula pynsngew ka ophis kala don jingmut ban pynkhreh ïa kane ka projek haki bynta ka Pynthorneiñ da kaba shna ïa ki kynroh na baroh ar liang ban pynheh ïa ka jaka ba tuid ka Wah Myntdu katkum ka Phase-1 na Tyrshi Fall haduh Jingkieng bad kane ka rukom shna kan long katkum ki plan ba thymmai kaba khang lad ïa ka um ba kan ym ïoh lad ban shlei sha ki pynthor kba.
Halor kane ka projek na ka liang ka seng jong ki nongrep kaba la tip kum ka Myntdu Pynthornein Farmer Welfare & Producers Organisation kala pynpaw ka jingsngewkmen halor ka jingwan kum kane ka projek naka bynta ka jingmyntoi ki nongrep.
U ma K.L. Pariat uba dei ruh u nongaibuid (Adviser) jong kane ka seng ula kyntu ïa kane ka tnad ban kan ïaid shakhmat da ka jingïatrei lang naduh ki trai jaka bad ki nongrep, la kumno kumno kane ka projek ka sdang noh ban treikam ha kine ki kyndiat bnai hadien ba kut jong u snem.
Ula kyntu ruh haba pyntrei ïa kane ka projek dei ban shan ha ka rukom kaba janai bad kaba paka khnang ba kan nym shah pynjulor kloi, ha ka juh ka por dei ban pyndonkam lang ïa ki maw bad u shyiap ba ïoh na katei hi ka Wah (Myntdu) bad ki nongtrei ruh kidei ban long hi da ki trai shnong.
Ula ïathuh ba ki lai tylli ki wahduid (liar) kiba ktah bha ïa ka wah Myntdu ha ki bynta ka Pynthorneiñ ki long ka Kdong Moolaiñ, ka liar Kam Kam bad ka liar ba wan na Jail kine kila wan rah shibun eh ki jingjakhliah ïa ka Wah. U ma Pariat u don jingkymen ba kane ka jaka Pynthorneiñ kan long kum ka Ego-Agro Tourism bad kan long ka spah bah ha kine ki sngi ban wan.
La pyntip ha kane ki sngi ban wan ka ophis WR kan pynlong ïaka jingleit leh (Survey) ha kine ki bynta ba shan ïa kane ka projek, da kaba kyntu lang ïa ki trai jaka bad ki nongrep ba kin donlang ha kitei ki sngi khnang ban ïoh ka jingïamonjur lang.