Kular ka Myntri ban pynbiang ïa ki tiar ai jingsumar ban pynsuk ha sor ne nongkyndong

Ha ka sngi plie ïa ka PHC ha Lawbah

0

Shillong, Jymmang 20 : Ka Myntri ka tnad ka Koit ka Khiah ka Dr Ampareen Lyngdoh ha ka sngi Saitjaiñ ka la plie paidbah ïa ka Primary Health Centre kaba don ha Lawbah ïa kaba la tei ha ka jinglut kaba 4.19 klur.
Haba kren ha ka jingïalang, ka Myntri ka la ong ba ka sorkar jylla ka buh ïa ka thong ban ai ka jingshakri kaba paka tam eh ha ka thaiñ bad kane ka PHC kadei ka nongmuna jong ka jingtrei shitom jong ki ban ai ka jingshakri bad pynsuk ïa ki paidbah haba pang ba shitom la ka long ha sor ne nongkyndong.
Nalorkata ka Myntri ka la ai khublei ruh ïa baroh kiba la donkti ban pynurlong ïa katei ka jaka sumar ba kan ïeng ha Lawbah ban ai ka jingshakri ym tang ïa katei ka thaiñ hynrei wat ïa ki bynta ba marjan ruh. Ka kyntu ruh ïa ki paidbah ba kin ïai bteng ban ai ka jingïatreilang na ka bynta ban pynbha shuh shuh ïa ka jingshakri.
Ka Myntri ka kyntu ruh ïa ki paidbah ban ai ka jingïatreilang kaba jan bad ka tnad bad ruh ban peit lang ïa ki jingtei bad ki sawdong sawkun jong katei ka jaka ai jingsumar.
“Ka sorkar ka kular ban pynbiang ïa baroh ki jingdonkam la ka long naduh ki nongtrei, ki tiar ki tar bad ruh ki jaka sah na ka bynta ki nongsumar jong ka PHC ba kin lah ban treikam bha. Ka la ai ruh ka jingïaroh ïa ka Special Purpose Vehicle Society ba pyntreikam da ka Lafarge Umiam Mining Private Ltd. (LUMPL) ban thied ïa ki mashin bapher bapher ban pyndonkam ha ka PHC na ka bynta ban pynsuk shuh shuh ïa ki paidbah ba wan shah sumar.
Ha kane ka sngi la donlang ruh u MLA ka Mawsynram Bah Olan Sing Suin, nangta ka Deputy Commissioner ka East Khasi Hills Kong RM Kurbah nalor kiwei kiwei ki ophisar jong ka tnad ka Koit ka Khiah ha ka jingïalang kaba long ha phyllaw jong ka PHC kaba don ha Lawbah.

Leave A Reply

Your email address will not be published.