Shillong, Jymmang, 20: Ki runar ki bym lah satia ban tip bad ban ithuh durkhmat ki la rong tuh haduh saw tylli ki taïar kaba ki la loit sor sor na kawei ka kali Maruti Alto 800 kaba don ïa u nombar ML05 Q-1016 hadien ba ki la prongtuh ha ka ing jong i Kong Angelica Lyngdoh Mawphlang kaba don ha Umphyrnai, Lad Smit, East Khasi Hills District.
Katkum ka jingïathuh jong ki trai iing, la ong ba kim lah satia ban tip ha kano ka por ba ki runar ki la loit ïa ki saw tylli ki taïar jong ka kali namarba kim shym la ïoh sngew eiei ïa ka jingsawa eiei na ka daw ka jingjur shaba palat jong ka lyer. Ki trai ing ki suba ba ki runar ki la loit tuh ïa kine ki taïar kali imat ha ka por ba la jia ka jingpynlip bording jong ka MeECL ha ka por shiteeng miet.
Halor kane ka jingjia, ki trai jong kane ka kali, ki la ujor da ka ejahar sha ki Pulit jong ka Madanryting Police Station ha ka 20 tarik u Jymmang, 2023 ban thwet ïa ki runar kiba donkti ha kane ka kam tuh kam lute.
Ki trai ing ki la pynpaw ruh ïa ka jingsuba ba ki runar kiba donkti ban tuh ïa kine ki taïar kali ki lah ban dei ki nongdih drok.
Ha kajuh ka por, ki trai iing ki la kyrpad ïa ki paidbah ba kin ym thied ïa ki taïar kali lada don kino kino kiba wan tyrwa hynrei ki dei ban pyntip sha ki bor Pulit lane sha ki bor synshar shnong khnang ba kan long ka jingmaham ïa ki paramarjan bad ïa ki paidbah nongshong shnong ba kin long kiba husiar ban thied ïa ki mar kiba shu ïoh tuh na ki briew ki bym ithuh.
