Shillong, Jymmang, 20: Ka kynhun ki nongthoh ka jaitbynriew Bengali jong ka thain Shatei Lam Mihngi kaba la tip kum ka Uttar Purba Bangla Sahitya Sabha hynnin ka sngi ka la pynlong ïa ka jingïakynduh lang kaba shisien shi snem ban ïatai halor ki ishu kiba ïadei bad ka ktien Bengali bad kumjuh ka jingithuh ba ki ïoh kum ka jaitbynriew hapoh kane ka thaiñ.
Ki nongïashim bynta ha kane ka jingïalang ki dei kiba mih khmat na ki jylla bapher bapher kiba kynthup ïa ki nongthoh kot bad poitri, ki riewshemphang, ki nongthoh khubor, u Vice Chancellor u ba la shongthait bad kumjuh ki nongmihkhmat kiba mynta halor ban ïatai ha kaba ïadei bad ka thoh ka tar ha ka ktien Bengali hapoh kane ka thain.
Kane ka jingïalang ka pynpaw ïa ka jingsngewkhia ba ki samla pule Bengali kim kwah ban shim ïa ka ktien Bengali kum kawei na ki sobjek pule.
Na ka liang kane ka jingïalang ka la pynsngew ba ka long kaba donkam ban kyntu ïa ki kmie ki kpa ban ai mynsiem ïa ki khun ki kti jong ki ba ki dei ban nang ban pule bad thoh ha ka ktien lajong.
Lah ban kdew, ki 1.5 klur ki Bengali kiba shong shnong hapoh ka thain ki dei kiba la don lypa naduh ka por bym pat phiah ïa ka Assam bad shuwa ban wan ka Sorkar Phareng.
Kane ka jingïalang ka la shim ruh ïa ka rai ban ïatreilang bad ki trai shnong kiba dei ka jaitbynriew ritpaid ban wanrah ïa ka jingshong suk shong shngain bad kumjuh ban ïada ka jinglong kyrpang jong baroh ki jaitbynriew bad kumjuh ïa ki kolshor jong ki.
Kiba bun ki la ïashim bynta ha kane ka conference ki la pynpaw ruh ïa ka jingsngewkhia halor ka jingpyrshang jong katto katne ki briew ban kam ba baroh ki jaitbyrnriew Bengali ki dei ki “Bangaldeshi”.
La thaw ruh ïa ka Coordination Committee kaba don 21 ngut ki dkhot na ka bynta pynurlong ïa ka thong ban pynkhie im biang ïa ka ktien Bengali bad ban ïatrei lang bad ki kynhun nongthoh bapher bapher hapoh kane ka thaiñ.
