Shillong, Jymmang 20 : Ha ka Lyngkhuh Shispah Snem jong ka St. Edmund’s College, ka Khasi Department ka la pynlong ka pyninam durim ka ba kyrteng “Apot” ba la pynmih bad lamkynto da u Bah Raphael Warjri. Ha kata ka sngi, u Bro Simon Coelho, Principal u la long u Kongsan bad u la pyllait ïa ka thup sahnam ‘Rynsan’ bad ïaroh ïa ka Khasi Department kaba la maitphang kum kine ki kam ki ba myntoi ïa ki samla pule. Ki kynrem lyndan ba la ïa don lang ha katei ka sngi ki long u Bah R V Warjri, Prof Antionette Kharmalki na Khasi Department NEHU, Padmashree Kong Patricia Mukhim, Taithoh kotkhubor, The Shillong Times, Bah Bobby S Basan, Khliehduh jong ka Khasi Department bad ki para nonghikai.
Ha ka ba sngewnguh artat ïa ka Riti Academy, u Bah Bobby S Basan u la kyntu ïa la ki samla pule ban khmih sani ïa ka durim khnang ban pynkhraw ïa la ka jingtip ha ki liang bapher bapher. La pynithuh ïa u Bah Raphael Warjri kum u Lamkynto Durim da u Dr Ronald P Kharshiing, u nonghikai ha College bad u Saiñpyniar jong ka Synjuk ki Nongthohkot Khasi ne Khasi Authors’ Society.
Ka durim Apot ka dei ka ba la shna katkum ka khanatang shaphang u Tiewlarun ba la sot na ka u Rabon Sing Kharsuka, hynrei la pynwandur hi da u Lamkynto katkum ba dawa ka khana khlem da kynriah na ka pdeng khana puriskam. Kumta ym shym la kyndat ïa ka khana pdeng, hynrei la bynrap ki snap jong ka deiti Khasi ki ban pynphuh pynphieng ïa ka durim. Ka ktien durim bad ka pharshi jong ka khana puriskam ka dei ka ba la pynbit pynbiang hi da u Bah Raphael Warjri, ha ryngkat ba ïa syllok bad u Rembrandt Iakmenlang Kharnaior, Lamkynto Durim bad u Bah Banjop Leo Kharmalki, Symbud nongkyrsei. Ki ba la ïadon lang ha katei ka sngi ki long ki tyngshop bad puron, Synranki Najiar bad Darhun Marbaniang, ha ka ba la ïoh ban ïa pashat jingmut lang bad ki samla pule jong ka College.
