Kular ka MTDC ban ym pynjlan shuh ïa ka kontrak u Puranjan Das kum u CGM

Shillong, Jylliew, 28: Ka Hynñiewtrep Youths Council (HYC) kaba la ieng pyrshah ïa ka jingpynjlan ïa ka jingthungkam ïa u Puranjan Das kum u Chief General Manager (CGM) jong ka Meghalaya Tourism Development Corporation Limited (MTDCL) hadien ba u la shongthait na ka kam, ha ka sngi Balang da ki spah ngut ki dkhot ki la rah da ki plakad ha phyllaw jong ka State Convention Centre.
Ka seng ka la pynlong ïa kane ka jingïakhih shwa ban sdang ka jingïalang jong ka Board Meeting ka MTDCL ha State Convention Centre.
U Chairman jong ka MTDCL u Bah Sanbor Shullai bad u Managing Director u Bah Cyril V. Diengdoh kiba la khot ïakren ïa ki nongïalam ka HYC ban pynsngewthuh halor kaei ka daw ba la pynjlan ïa ka jingtreikam jong u Puranjan Das.
“Ngi la pynpaw ka jingbymsngewtynnat ïa kane ka jingleh jong ka MTDC bad ngim kwah ba kane ka jingleh jong ki ophis treikam bapher bapher ne ha MTDC lane hangno hangno ruh ba kin shu shu pynjlan ïa ka kam shakri jong ki briew kiba la shongthait na ka kam,” ong u General Secretary ka HYC u Bah Roy Kupar Synrem ha ka jingïakren bad ki lad pathai khubor.
“Ki heh ka MTDC ki la kren ha ngi da kaba shai ki la ailad ïa une u briew (Puranjan Das) ban trei sa hynriew bnai ha kato ka por ha ka 31 tarik, Lber, 2023 namarba ka don ka Model Code of Conduct ba kim lah ban khot ïa ka Advertisement bad ba ka don ka Year Ending bad ba ki don ki jingïalang kiba ka Sorkar ka la pynlong ha ki bnai baladep bad ki (MTDC) donkam ïa u briew uba bat ïa kata (Chief General Manager) ka post,” u la ong.
“Ki la ai ka jingkular ïa ngi ba ynda la kut ka kontrak kaba hynriew bnai ha u bnai Nailar, ka MTDC ka la rai ban khot Advertisement ïa ka post Chief General Manager,” la ïathuh u Bah Synrem.
“Ynda la khot ïa ka Advertisement, kino kino ki khun samla jong ka jaidbynriew kiba kot kyrdan ki lah ban aplai ïa kane ka kam,” u la bynrap.
U la ïathuh ba kane ka jingïakhih pyrshah jong ka Seng ha State Convention Centre shwa ban sdang ka jingïalang jong ka MTDC ka long ban pyrshah ïoh ba ka Corporation ka shim rai ban dang pynjlan ïa ka kontrak jong u Puranjan Das.
U General Secretary ka HYC u la ong ba ka seng kan ap tad haduh kaba kut jong u bnai Nailar ba ka MTDC kan khot noh da ka Advertisement na ka bynta ka post Chief General Manager kumba la kular da u Bah Sanbor Shullai bad lada ka Corporation kam kheiñkor ïa ki jingkular ka seng kam banse ban pynlong da ki jingïakhih kiba tyngeh.