Ngim dei ban duh ïa ka bor bad ka iktiar ban bishar ba la ai da ka Sixth Schedule : CEM KHADC

Shillong, Jylliew 28 : U Chief Executive Member ka KHADC, Bah Pynïaid Sing Syiem ha ka sngi Balang u la ong ba ka bor ba la ai da ka Khyrnit kaba Hynriew ban bishar khadar ha ki District Council, kim dei satia ban duh noh ïa ka.
Ïa kane u CEM u la kren haba jubab halor ka mat ba wanrah da u Nongïalam ka Liang Pyrshah Bah Titos W Chyne haba ïatai halor ka Mangtyngka ha ka Dorbar Lyiur jong ka Council hynne ka sngi haba ïadei halor ka jingma ba ki Iing Bishar jong ka Council kin sa duh bor noh hadien ba ka sorkar ka la pynbna ban pyntreikam noh ïa ka Code of Criminal Procedure (CrPC) bad ka Code of Civil Procedure (CPC) ha ka jylla.
“Ngi la ïohsngew ba ka don ka Jingpynbna (Notification) na ka sorkar jylla halor kane hynrei ngi ïohbor na ka Khyrnit kaba Hynriew halor ka bor ban bishar bad kumta ngim dei satia ban duh ïa ka,” ong u CEM.
Katba na ka liang u Deputy CEM ba dei peit ïa ka tnad Law jong ka Council, Bah PN Syiem pat u la ong, “Ngin buddien ïa kane ka kam bad ka sorkar.”
Shuh shuh u CEM u pan ruh ka jingïatreilang na ka Liang Pyrshah halor kane ka bynta.
Shwa kane u Bah Titos u la ong ba ki sngewsih ban ïohi ba ha u snem ba la dep ka sorkar ka la pynmih da ka Notification ban pyntreikam ïa ka CRPC bad CPC ha ki Kashari ba don ha ka jylla baroh kawei.
Shuh shuh u ong ruh ba ka EC ba la dep ka la leit ban plie bun ki district council court ha kylleng ki distrik kum ha Nongpoh, Mawkyrwat bad Nongstoin ban pynkhluan shuh shuh ïa ka bor ba ka District Council ka don ha ka liang ka bishar khadar.
U ong ruh ba na ka por sha ka por ki ju kren bad ka sorkar jylla hynrei la pynsngewthuh ïa ki ba kan ym ktah ïa ka bor jong ka District Council.
“Hynrei sngewsih bad nga kren da ka jingsngewkhia ba bun ki mukotduma kim wanphai shuh sha ki court jong ka Council namar ki mukotduma hapdeng para riewlum ki district court ruh ki la shim namarba ka sorkar jylla ka la buh ïa ki Kashari wat ha ki Sub Division bad ha ki distrik ruh” u la ong.
U Bah Titos u ong ruh ba kane suki suki ki Kashari jong ki district council kin sa khang khyrdep bad ki village court bad ki additional subordinate kiba don kin sa duh bor noh. “Bad haei kata ka jingpynkhlain jongngi ïa ka Khyrnit ba Hynriew. Lada ngi duh ka bishar ngin sa duh ruh ïa ka synshar,” u la bynrap shuh shuh.
Kumta u kyntu ïa ka EC ban kren biang bad ka sorkar bad ban shai ba ïa ki mukotduma hapdeng riewlum dei ban leh ha ki district council court ban pynneh ïa ka bor bishar jong ka District Council.