Kular ïakren bad ka sorkar Assam ba thmu pynkylla Wildlife Sanctuary ïa ki shnong Khasi ha Barak Valley

Pynbiang ïa ki kot ki sla ong u bah Paul ïa ki 1.5 lak ngut ki paid Khasi

0

Silchar, Risaw 9 : U bah Paul Lyngdoh, President ba rim ka Khasi Student Union (KSU), Myntri sorkar ba mynshwa, u Executive Member (EM) ka Khasi Hills Autonomous District Council (KHADC) mynta bad MDC na ka Jaiaw Constituency ha ka jingleit ai mynsiem ïa ki paid Khasi kiba sah ha Barak Valley, Silchar Assam ha ka jingïalang kaba heh tam kaba la pynlong shisien shisnem da ka KSU Barak Valley Circle u la kular ban ïarap ïa ki paid khasi kiba don palat ïa ka 1.50 lak ngut ha katei ka jaka ban ïakren bad ka sorkar Assam halor ka jingthmu ban pynkylla Wildlife Sanctuary ïa ki shnong ba sah ki Khasi-Pnar tangba u la kyntu ïa ki ba ki dei ban pynbiang ki kot ki sla shwa ba un leit ïakren bad ka sorkar Assam.
Kane ka jingïalang kaba heh tam jong ki paid Khasi ba sah ha Barak Valley ka la long ha ka Sngi Saitjaiñ ha Kashiya Punjee, Krishnapur ka la rai da kawei ka jingmut ban pyrshah beit ïa ka jingthmu ka sorkar Assam ban pynkylla Wildlife Sactuary ïa katei ka jaka ba sah ki paid Khasi namar lada pynkylla kum ka wildlife sanctuary ki khasi kin ym lah shuh ban rep ban riang bad pom wat tang ïa uwei u dieng ruh bad kane kan ktah jur ïaki bad ki sa kylla phetwir na ka jaka kaba ki la im la san da ki phew bad spah snem mynta. Kumta ha katei ka jingïalang da kawei ka sur la rai ban pyrshah beit ïa kine ki projek jong ka sorkar Assam bad ki la rai ruh ban pynjur da ki jingïakhih lada jia ba ka Assam ka leh donbor ïa ki namar ki la dei ki trai shnong ha katei ka jaka.
U bah Paul Lyngdoh uba long kum u kongsan ha kane ka jingïalang u la ong “ Kum u nongïalam uba ieit ïa ka jaidbynriew kam pher lada phi sah ha kano kano ka jaka ruh nga kloi ban leit ïakren bad ka Assam ban pynsangeh ïa kane ka jingthmu tangba nga kyntu jur ïa phi ki paid Khasi Pnar kiba sah hangne ha Barak Valley ba phin ïa pynbiang ïa ki kot ki sla khnang ba haba ngin leit ïakren ngin don ha ka nongrim kaba skhem”.
Shwa ïa kane ula pynher ruh ïa ka lama jongka KSU ha katei ka jaka shwa ban sdang ka jingïalang. Da ki phew hajar ngut ki paid Khasi Pnar ki la ïapoi sha katei ka jingïalang khamtam haba ki la tip ba kin wan ki nongïalam ka KSU ba rim bad ba mynta nangne na ri lum Khasi bad Jaintia.
Baroh ki nongkren ha ka jingïalang ki la pynpaw beit da kawei ka sur ban pyrshah ïa katei ka jingthmu ka sorkar ban pynkylla Wildlife Sanctuary ïa kitei ki shnong Khasi namar ka jignthmu ka long ban buh ar tylli ki Wildlife Sanctuary bad kawei ka Reserve Forest.
Na ka liang U President ka Khasi Student Union (KSU) u Lobingwell Mukhiya u la pynpaw ba ka jingthmu ba kongsan jong kane ka jingïalang ruh ka long ban pyrshah ïa kine ki ar tylli ki wildlife sanctuary ka Barak Bhubon Sanctuary bad ka Borail Wildlife Sanctuary. U la ong “ Ym dei tang ki paid riewlum Khasi Pnar bad kiwei ki para riewlum ki ban shah ktah hynrei wat kiwei ki jaidbynriew ruh kin shah ktah lang lada kine ki projek ki treikam. Ka sorkar kam dei ban leh matlah namar ngi la sah ha kane ka jaka naduh ka por jong ki Syiem hyndai jong ngi bad mynta kane ka sorkar kam lah ban shu pynkylla phetwir ïa ngi kumta ngi dawa ba ka sorkar ka dei ban pynsangeh noh ia katei ka jingthmu”.
U Samla Wanbor Podang, General Secretary ka KSU Barak Valley Circle u la ong “Lada ka sorkar Assam kam sngap ïa kine ki jingdawa jongngi ngim banse ban pynlong da ki jingïakhih paidbah namar kine ki wildlife sanctuary kin ktah kumba 150 tylli ei ei ki shnong bad ki don palat 1.50 lak kiba sah ha katei ki shnong bad kane ka la long kumba pyniap im im peit peit ïa ngi”.

Leave A Reply

Your email address will not be published.