Ïam kthang ka Kurim tang shu poi ïing ka synduk ba thep ïa ka met u Bah Tiklu Jyrwa

Shillong, Risaw 09: Ka la long ka jingïam kthang jong ki khun ki kti bad ki bahaing hasem ha ka ïing ka sem jong ka Kong Indalin Lyngdoh Marshyllong kaba dap da ka jingpait ka dohnud tang shu poi ka synduk ba la thep ïa ka metïap jong u kurim jong ka, u Bah Tiklu Jyrwa, u nongkiew lum na kane ka jylla Meghalaya uba la duhei ïa la ka jingim bad ki 29 ngut ki nongkiew lum kiba la shah tep im ha ka jingtwa jong u lum thah Draupadi ka Danda, u lum thah uba don ha Jylla Uttarakhand ha ka 4 tarik mynta u bnai ha ka por 8:45 baje mynstep.
Ïa ka met jong u Bah Tiklu Jyrwa uba sah ha ka shnong Upper Lumparing, Shillong la wan kit da ka liengsuiñ na Dehradun haduh ynda poi ha kad liengsuiñ Guwahati ha kaba la shimti pat da ki bahaing hasem bad ki dkhot jong ka Meghalaya Sports Clim-bing and Mountaineering Association (MeSCMA) ryngkat ka jingsynran lang jong ki bor synshar ka East Khasi Hills District bad ki bor Pulit.
La sakhi ba ki paitbah ka shnong Lumparing bad na ki shnong ba marjan ki la ïeng ha shi lynter ka surok jong ka shnong Lumparing ban pdiang burom ia ka met jong u Bah Tiklu Jyrwa.
Katkum ka jingïathuh jong u Bah Wallambok Lyngdoh Marshyllong, ïa ka met jong u Bah Tiklu Jyrwa yn sa tep donburom ha ka sngi Baar mynta ka taiew ha u Lum Jingtep jong ka Balang Presbyterian Lumparing.
U Bah Tiklu u dei uba la don arngut ki khun kiba dang rit, kata, iwei i shynrang bad iwei i kynthei.
Kum ban shu pyntip hangne, ka kynhun ba 29 ngut ki nongkiew lum bad hynñiew ngut ki nongai jinghikai lane ki Mountaineering Instructor jong ka Nehru Institute of mountaineering (NIM) Uttarkashi District, Uttarakhand ki la shah tep im na ka jingtwa jong u lum thah katba ki dang wan phai na ka jingleit kiew ïa u lum Draupadi Ka Danda ha ka 4 tarik mynta u bnai ha ka por 8:45 baje mynstep.
U Bah Tiklu uba dei u dkhot jong ka Meghalaya Sports Climbing and Mountaineering Asso-ciation (MeSCMA) u la leit ïashim bynta ha kane ka jingshah hikai kiew lum da ka jingbei pisa jong ka Directorate of Sports and Youth Affairs lyngba ka MeSCMA.
Ka Nehru Institute of mountaineering (NIM) ha u kyrwoh ba la phah ha ka sngi Saitjaiñ ka la pyntip ba ki met ïap ba la ïoh sei na ka jingtwa u lum thah tad haduh ka sngi Thohdieng ki long 26 tylli, kata, ba kynthup ïa arngut ki nongai jinghikai bad 24 ngut ki nongshah hikai.
Ha kaba ïadei bad kane ka jingjia, ka kynhun ai jingïarap jong ka State Disaster Response Force lem bad ki shipai suiñ Indian Air Force ki dang pynlong ka jing leit wad ïa ki lai ngut kiba dang jah rngai ha kane ka jingjia.
Ki bahaing hasem jong u Bah Tiklu Jyrwa ki la pynpaw ïa ka jingsngewnguh bad ka jingai khublei ïa ka Sorkar Meghalaya kaba la ai jingïarap ban pynpoi biang ïa ka met jong u Bah Tiklu Jyrwa sha la ïing.