Kop u Conrad Sangma baka NPP kan thaw sorkar marwei hadien ka election 2023 ha ka jylla.
Wat la bun kiba kawang maw bad kawang ktieh ïa ka NPP
Nongpoh, Kyllalyngkot 06: Haba kren haka jingïalang ban pdiang burom ïa u Bah Jason S Mawlong MLA ka Umsning, u Bah Donkupar Sumer MDC barim ka Umsning ryngkat bad kiwei ki nongïalam ba la wan pynïasoh sha ka party NPP mynta ka sngi ha Umsning, u Myntri Rangbah ka jylla u ba dei ruh u National President ka National People’s Party (NPP) u la ong ba ka jingwan pynïasoh jong kitei ki nongïalam kan dang pynkhlaiñ ïaka party ym tang ha Umsning Constituency hynrei haka jylla hi baroh kawei kumba bun naki nongïalam bad ki MLA kin dang pynïasoh sha ka party.
U Conrad K Sangma u la ong ruh ba watla bun kiba beiñ, kiba kawang maw ïaka party, hynrei ka party NPP ka dang khlaiñ katba nangmih ki sngi bad kop ruh ba ka party NPP kan thaw sorkar marwei ha u 2023 namar u tip skhem ba ki paidbah ki dang shaniah ha kane ka party kaba la wanrah shibun ki jingkylla ha kine ki 5 snem bala leit noh.
U la ong ruh ba ka sorkar NPP ka buh hakhmat ïaka jingeh jong ki paidbah bad dei namar ka jinglen lade jong ki nongïalam ha kine ki 5 snem bala leit noh la lah ban wanrah shibun ki skhim sorkar, ki project, ki surok bapher bapher, ka jingkyntiew ïaka kam rep kam riang, ki longkmie lyngba ki SHGs kiba tang ha kine ki 5 snem kila tam bun shah ban ïaki sorkar jong ki 50 snem bala leit noh naduh ba ioh ïaka jylla ba pura.
“Katba nangmih ki sngi, ki nongïalam jong kiwei ki party ki iohi ïaka jingtreikam jong ka NPP kaba don ïaka thong ban pynlong ïaka jylla Meghalaya kum ka Model State haka ri, bad dei namar ki kam baka trei kiwei ki nongïalam kila sdang ban pynïasoh sha kane ka party naka bynta ka jingkylla bad kawei ka thong” la ong u Conrad da kaba bynrap ruh ba kam pher wat lada ki don shibun ki jingshah kawang ktieh, hynrei kum ki nongïalam kin pyndep ïaka jingthmu.
Namarkata naka liang u Conrad Sangma ha katei ka sngi u la kyrpad sha ki paidbah kiba la tuid ban sakhi ïaka jingpynïasoh u Bah Jasoh S Mawlong sha ka party NPP ba ki dei ban sngewthuh shai ïaka jingthmu bad ka jingangnud jong ka party namar kiei kiei kiba ym ju lah ban leh mynshuwa la lah ban leh ha kane ka sorkar kaba mynta hapoh ka jingïalam ka NPP khamtam ha kaba ïadei bad u pud u sam, u la bynrap.