Shillong, Lber 12 : U Nongïalam ka Congress bad MP ka Shillong Parliamentary Constituency u ma Vincent H Pala mynta ka Sngi Palei u la ong ba ka Congress kan hap ban ïa khun ïa kane ka election kaba 18 jongka ïing Dorbar Thawain Lok Sabha hapdeng kiba bun ki jingeh namar ka BJP ka la knieh jubor ïa ki 11 tylli ki Bank Account jongka Congress kiba don pisa haduh 215 klur tyngka.
U la ong ka jingïai kiew ki jingïaleh makynti ne jingïapher jingmut hapoh ka BJP ha kylleng ka ri kan plie lad ïa ki party ki bym don jingïadei bad ka BJP ban ïoh thaw ïa ka sorkar kaba thymmai hadien ka election.
Haba kren sha ki lad pathai khubor hadien ba la wai ka jingïalang jongka party u ma Pala u la ong “ Kane ka election ka lah ban ym long kum kiwei ki election namar kane ka jingleh jubor bad knieh jubor jongka BJP ïa ki Bank Account jongka Congress kiba don pisa 215 klur tyngka. Na katei ki la sei jubor ruh ïa ka pisa haduh 115 klur tyngka ban ai sha ka Income Tax. Kumta ngin hap ban ïaleh ïa ka election hapdeng kiba bun ki jingeh khamtam ha ka liang ka pisa ka tyngka. Ka BJP ka leh ïa kane namar ka tip shai kdar ba dei tang ka Congress kaba lah ban ïakhun ïa ka ha kane ka election.
Ha kine ki lai bad saw bnai ka party ka la lum synniang na ki paidbah ha kaba kiba bun ki riew shimet ki la noh synniang sha ka party. Don bun ruh kiba la noh synniang wat nangne na Shillong ruh. Haba ka BJP ka tip ïa kane ka la pynhiar kput da kaba sei ïa katei ka pisa bad thep sha ka Account jongka Income Tax.
U la pynpaw ba kine ki jingleh thombor jongka BJP ka la pynbitar ïa kiba bun bad khlem pep ka BJP kan sa ïoh hi la ka bainong ha kane ka election ba mynta. U pynpaw ka jingkyrmen skhem ba ki paidbah kin jied ïa ka Congress ban ïoh ïalam thaw ïa ka sorkar ha Delhi.
“ Ka BJP kumba long mynta ka la jur sa tang ki jingïapher jingmut ha kylleng ka ri. Mynshwa ki khlaiñ bha ha Bihar mynta kam long shuh kumta. Mynshwa ka khlaiñ bha ha Karnataka bad mynta kam long shuh. Mynshwa ka khlaiñ bha ha Rajasthan hynrei mynta kam khlaiñ shuh. Mynshwa ka khlaiñ ha Delhi hynrei mynta ka la nang troiñ nangtroiñ. Ka jur bha ka jingïaleh makynti para nongïalam kum ha Madhya Pradesh, Haryana, Bihar bad kylleng ki jaka. Ka la pynduh tiket ïa kiba bun ki MP, ki la pynkylla ïa kiba bun ki Myntri Rangbah. Kumta kine kiei kiei baroh ki la nang pyntroiñ ïa ka BJP namar ka la pyndonkam bakla palat ïa ka bor bad khamtam lei lei ka phrung beit da ka niam ha ka saiñ pyrthei kumta kane ka dei ka kabu ïa kiwei ki party ban pynkut noh ïa ka BJP.
Hangne ha Meghalaya ruh ki paidbah ki phai khmat sha ka Congress. “ Wat la kiba bun ki nongïalam ki la shah khring hynrei ki nongtrei ba shitrhem ki dang ïai neh bad ka Congress. Ki paidbah ki tip shai ba tang ka Congress kaba dei ka party kaba lah ban ïakhun ïa kane ka party shitniam bad khniot beiñ ïa ki rit paid katba ka Congress ka burom ïa ki rit paidbah bad ka ieit bad burom ïa ki trai ri trai muluk bad ki riewlum. Kumta ki nongthep vote jongka Shillong bad Tura ki tip lut ïa kine ki jingleh jongka BJP bad kumjuh ruh ïa ki kam jongka sorkar MDA bad na kata ka daw mynta ki phai khmat sha ka Congress” ong u ma Pala.
