Kner jingïarap ka FKJGP ïa ka longïing ba shah bamduh ha ka ding ha Nongkdait-Nongnah

Mawkyrwat, Ïaïong, 30: Ka Federation of Khasi Jaiñtia & Garo People’s jong ka Ranikor Circle ha ka sngi saitjaiñ jong ka taïew ka la ïoh ban leit ai jingïarap ïa kawei ka longïing kaba la shah bam duh noh ha ka ding ha shnong Nongkdait-Nongnah, South West Khasi Hills District ha kaba kane ka jingjia ka la jia dang ha kine ki khyndiat sngi ba la dep.
Lah ban kdew ba ka longïing kaba la shah bam duh ha ka ding ka dei jong ka kong Westinoris Nongmor kaba shong basah ha shnong Nongkdait-Nongnah, South West Khasi Hills District bad kane ka kong Nongmor ka don 7 ngut ki khun. Shuh shuh la ïathuh ruh ha kane ka jingjia kam shem la ïoh ei ei shuh bad ka ding ka la bam lut ïa baroh ki jingdon jingem bad kumjuh ruh ïa ki kot ki sla, ki jaiñ ki nep, bad ki jingbuh jingsad kaba ym duna ïa ka T. 2 lak tam. Ka la ïathuh ruh ba ka jingkem ding ka dei ha ka por mynsngi bad ka jingkem ding ruh ka sted bha namar artad ka dei ka por rang ryngkhiang ka bneng bad da kata ka ding ka la ïoh lad ban bam duh ïa baroh ki jingdonkam kiba don hapoh ïing.
Namarkata, da ka mynsiem jong ka jingsngewlem, na ka liang ka FKJGP jong ka Ranikor Circle ka la ïoh ban ai sngewbha da ki tiar ïing naduh u khaw bad ka song pisa ha kaba ha kane ka sngi la sakhi lang da ka jingïadonlang u General Secretary ka FKJGP South West Khasi Hills District, u bah Belsi Kharbani, u President ka FKJGP Ranikor Circle, u bah Ferdinand Iawphñiaw, u Myntri Shnong jong ka Nongkdait-Nongna, u bah Emeral Langte lem ruh ki dkhot jong ka FKJGP Nongnah Unit.
Hadien ka jingnoh jingïarap, u bah Belsi Kharbani bad u bah Ferdinand Iawphñiaw haba ai jingkren ha ki lad pathai khubor ki la pynpaw ba kum ka FKJGP hadien ba ki la ïoh ka jingtip halor kane ka jingjia kam lah ban shu sngap jar, hynrei da ka mynsiem jong ka jingsngewlem bad sngewsynei ki leit ban ïa kynduh markhmat ïa ki trai ka longïing kaba long kum ka dak kaba rit eh ban ïa kti lem lane ban ai ka kti ka mon ka kti ka diang ban noh ki lad jingïarap watla kim lah ban ai shibun hynrei tang kum ka dak ka long ka jingnoh synñiang lem ha don kum kine ki jingjia ïa ki longïing bad kaba mad ïa ki jingsngewsih ba ki la duh noh kat ïa ka ïing ba ki ju pyndonkam ban shong ban sah.
Ha kawei pat ka bynta na ka liang ki nongïalam jong ka seng ki la pynpaw ruh ba ha kine ki sngi ban sa wan kin sa leit ïa kynduh ïa u Block Development Officer (BDO) jong ka Ranikor C&RD Block bad kyntu ba na ka ophis kin thaw lem ki lad ki lynti ban ai jingïarap lem lyngba ka skhim ba kyrpang ïa kane ka longïing bad ha kajuh ka por la kyntu ruh ba kum ki paradoh parasnam, la ki ‘riew shimet ne kino kino ki seng treimon sngewbha kiba don ka mynsiem ban ïarap ïa kiba shem jingjynjar ba kin sngewbha wan ai mynsiem lem da kaba leit ïa kynduh markhmat bad katei ka longïing kaba la shem lanot ba ka ïing jong ka ka la shah bam duh noh ha ka ding.
Katba na ka liang u bah Emeral Langte, Myntri Shnong Nongkdait-Nongnah pat u la pynpaw ka jingsngewnguh ïa ka FKJGP da kaba u la ai ka jingkitbok kitrwiang ba kane ka seng kin nang lah ban leh bha shuh shuh nangne shakhmat ban ki jingïarap ïa ki briew kiba shem lanot bad ba shem jingjynjar ha kane ka dong ka thaiñ bad ha ka jylla hi baroh kawei.