Nongstoiñ, Ïaïong, 30: Ha ka sngi saitjaiñ ba la dep ki nongïalam bad ki dkhot jong ka FKJGP Mawlangsu Area unit, hapoh ka jingïalam jong u bah Syrpaily Kharit president ba la synran lang da u bah Robert Wahlang Organising secretary ka FKJGP Rambrai circle, ki la leit ban jurip ïa ka Sub Health centre kaba don ha ka shnong Mawlangsu. Ha katei ka jingleit jurip, ki nongïalam ka seng ki la lap ba katei ka jaka sumar, ka dang don shubun ki jingduna kata naduh ki nongtrei haduh ki tiar ki tar kiba dei ban pyndonkam ha katei ka jaka sumar.
Ha kaba ïadei bad katei ka jaka sumar, na ka liang u bah Syrpaily Kharit President ka seng u la ong ba katei ka jaka sumar ka long kaba donkam haduh katta katta, namar ki paitbah nongshong shnong naduh Nongriat, Mawlum, Nginïong, Mawbudum, Lumyrsiang, Tiehdang, Mawlangsu, Domkohmen bad kiwei kiwei ki shnong haba ki shitom ki hap ban wan ha katei ka jaka sumar.
U la ong ruh ba katei ka jaka sumar ka dei kaba donkam eh na ka ka bynta ki longkmie kiba ar met bad ki khunlung, namar lada leit shaduh Nongstoiñ ne sha Markasa PHC ruh ka la jngai. Tang na ka bynta ban phah checkup ïa ki longkmie kiba ar met kiba shait ba khlaiñ ban hap leit haduh Nongstoiñ ne Markasa, ka la ktah ïa ka por bad ka bai leit bai wan.
Kumta na ka liang ka seng ka la kyntu jur ïa ka sorkar ba ka dei ban pynbiang noh ïa katei ka jaka sumar, na ka bynta ka jingbit jingbiang jong ki paitbah nongshong shnong.
