Beh ïa ki nongwei ym da ka wait hynrei da ki kam ba ngi trei hi: Michael Thongni

Nongstoiñ, Ïaiong, 30: Ka Northeast Institute of Professional Studies, ka shlem ai jinghikai seng kam lajong khlem jingsiew, ha ka sngi thohdieng jong ka taiew ba la lah, ka la pynlong ïa ka, “Startup tools distribution, Awareness and Financial literacy program”, ha ka tnad jong ka ha Pormawthaw, West Khasi Hills District na bynta ki Rangbah bad Samla kiba la pyndep ïa ka jingshah hikai ban trei Misteri ha ka jingkyrshan ka National Bank for Agriculture and Rural Development, Meghalaya Regional Office.
Ha kane ka sngi la ïadon ryngkat ka Kong Phila Nongkynrih, DDM, NABARD kum ka kongsan, Kong Patricia Warjri, LDA, Labour Office, West Khasi Hills District kum ka nongkren, Bah Wilfred Dohling, Branch Manager, MRB, Riangdo kum u nongkren, Bah Rangshai Ryntathiang, President, VDP, Pormawthaw kum u nongshah khot sngewbha bad u Michael Thongni, CEO&MD, NeIPS.
Ha kane ka sngi la sam ruh ïa ki tiar seng kam lajong sha ki rangbah bad ki samla jong ka shnong Pormaw-thaw, kiba la pyndep ïa ka jingshah hikai khnang ba kin lah ban sdang ne seng noh ïa ki kam lade.
Ka Kong Philakyntiew Nongkynrih kum ka kongsan haba ai jingkren, ka la pynpaw ïa ka jingsngewkmen, haba ka sakhi ïa ka rukom shakri ka NeIPS ïa ka thaiñ bad ka dap da ka jingsngew hun ban ai jingkyrshan ïa kum kane ka Institute, kaba ju wanrah ïa ki jingdonkam kaba ki khun samla ka thaiñ ki donkam. Ka la ong ba ka NABARD ka dei ka Bank kaba wanrah ïa ki kam pynroi kum ha ka rep ka riang bad kiwei de, kiba lah ban ai jingmyntoi haba bun bah ki liang kiba ïa dei bad ki thaiñ nongkyndong.
Ka la batai ruh shaphang ka jingdonkam ban long adkar ha ka rukom kynshew pisa bad kumno dei ban kiar na ka jingshah tuh pisa ei na ki briew kiba shukor lyngba ki kor technology mynta. Ka la ong kane ka jinghikai ban trei mistery ka donkam shaba palat namar bun ki ïing la shu shna khlem ka jingthew jingwoh kaba biang. Kumta, ka long kaba mynsaw, hynrei mynta kane ka training ka la tei ïa ka jingstad ki mistery ha kaba nangne sha khmat, haba shna ïa ki ïing kin ïaid lyngba ki jingthew bad jingwoh kiba bïang katkum ka jinglong jingman ki jaka shwa ban ka ïing.
U Bah Michael Thongni, Managing Director bad Chief Executive Officer, NeIPS, haba kren u la ai khublei ïa ki samla namar ka jingïai ai mynsiem ka jong ki ïa u, ba un shakri ïa ki wat la ka lynti ka long kaba khim bad kaba jwat. Kane ka jingieit ka jong ka la pynlong ïa u ban pynïar ïa ki tnad ha ka kylleng ka jylla ban ai ïa ka jingshakri kaba kham jan khnang ba ki samla ki ba duk, kim donkam ban wan shaduh Shillong ne Nongstoiñ ban pynlut pisa.
U la pynsngew ba bun na ki samla na ka Khliehriat ki la phone bad kyrpad ïa u ban plie sa kawei ka shlem hangtei ban ïarap ïa ki bad na ka liang ka jong u, u la kular ban plie noh ha u ne u bnai ban wan, khnang ba ki samla ki ba kyrmen ha ka NeIPS kin nym rit mynsiem ne sngew marwei haba thaw ïa ki lad ban pynskhem ïa kamai bad ban dap u khiew ja. U la ong ka jingthmu kaba hakhmat eh kane ka Shlem, ka dei ban law noh ïa ka jingkyrduh kam ki samla lyngba ki jinghikai ban seng kam lajong.
Namar ki samla ki long ki mawlynnai kiban tyngshaiñ na bynta ka lawei ka ri. U la kyntu ïa ki samla bad da lei lei kim dei ban shu ap khmih ban ïoh kam sorkar, hynrei dei ban pyrkhat kumno ban wanrah ïa ki kam kum ka kharkhana shna shuki plastic, kaba lah ban thaw kam ïa kiwei bad ïarap ruh ïa ka mariang. Namar ki tiar ban shna ki dei ki plastic kiba lah ban shu tam na ki jaka kiba la bret ki briew, kane ka wanrah ruh ïa ka jingkhuid jingsuba, u la bynrap.
“Lada ngi kwah ban beh ïa ki nongwei ym dei da ka wait, suloi ne ki khnam ha kum kane ka juk, hynrei ngi dei ban knieh ïa ki kam da kaba ngin trei hi bad kumta kin sap het namar ki wan shane ruh dei ba ki ïohi ba ka dang bun ka lad ka lynti ban kamai” u la ong.
“Ka jylla jong ngi ka dang don shibun ki kam ba ngi lah ban seng, namar dang bun ki ba ym pat don, tangba kawei kum ki samla ngi dei ban kiar kata ka long ban tynneng ïa ka rukom seng kam, namar kan nym pynkiew lano lano ruh hynrei kan pynhiar lang, lada u wei u briew u seng Restaurant ngi dei ban seng ka jaka saiñ ban pynmih ïa u noodles kane kadei kata ka rukom ban leh business namar kandon ka jingïakylliang pisa”.
U la pynkut da kaba ong, “Lada ngi kwah ban kdang ngi bam da ka ja, lada ngi kwah ban jop ïa ka thong ngi dei ban mad ïa ki jingeh bad kan hikai ïa ngi ban long ki nongjop”.
Na ka liang u Bah Rangshai Ryntathiang, President, VDP, Pormawthaw u la ïaroh ïa kane ka Shlem, namar ba ka leh ïa kaei ba ka ri ka donkam kyrkieh. U la ong kam dei ka kam ba suk bad haduh katno ka jinglen lade u sngewthuh bha, namar ïalade ruh u dei u nongpynïaid ïa ka school jong u Kpa. Kumta u la kyntu ïa ki samla ban shim kabu bad ban long kiba trei shitom, khnang ba ka ri kan phyrnai ha ka jingïalam ka jong ki ïa ki longdien.
Ha kane ka sngi la pynlong ruh ïa ka jingpynshai shaphang ki jingmyntoi kiba ka Labour Dept ka ai sha ki nongbylla sngi na ka Kong Patricia Warjri, LDA, Labour Dept, West Khasi Hills District bad la ïoh ruh ïa ka jingpynshai na ka liang u Bah Wilfred Dohling, BM, MRB, Riangdo ïa ki jingmyntoi kiba lah ban ïoh na ka MRB haba don ka jingthmu ban shim ram.