Nongstoiñ, Ïaïong 30: Kawei ka longkmie kaba la tip kum ka kong Streamilda Syiemlieh na ka shnong Langja ryngkat bad ka kynhun jong ka, ki la kynnoh ba ki paitbah shong kiba shong ha katei ka thaiñ kata naduh Ktiehthawïar, Khyllemsangrin, Umthlu, Langja, bad Mawri ki la shu shong beaiñ bad ki rep ki riang, ki thung ki tep, ki trei ki ktah khlem da pan jingbit na ka kaba dei ka trai khyndew.
Ha kaba ïadei bad ka jingkynnoh jong katei ka longkmie, u bah Likshon Syiem na ka shnong Mawri bad u bad B.Kharsyiemlieh na ka shnong Langja, haba pyntip ha u nongthoh khubor ki la ong ba ha kine ki taïew ba la dep ki la lum ïa ka jingïalang paitbah ha ka shnong Umthlu, ha kaba ki la khot lang ïa baroh ki paitbah jong kitei ki shnong ha kaba ki la ïapoi lut naduh ki rangbah, ki longkmie, ki samla bad wat ki khynnah ruh.
La ong ba ha katei ka jingialang, ki paitbah ki la pynpaw ïa ka jingpyrshah kaba jur ïa ka jingkynnoh jong katei ka longkmie bad ïa ka jingkam jong ka ba kitei ki shnong baroh ki dei kiba hap ka khyndew jong ka. Kitei ki rangbah ki la ïathuh ruh ba kitei ki shnong baroh ki dei kiba hap ha ka Hima Jyrngam Sirdarship, ha kaba ka khyndew Langja ka don hapdeng ka mokotduma la pat hynriew phew snem, hapdeng ka kynhun jong ka Trinly Syiemïong kaba dei kaba kam nyngkong eh ba ka dei ka trai khyndew bad ki paitbah, pyrshah bad ka kong Streamilda Syiemlieh ryngkat bad katto katne ki longïing kiba kyrshan ïa ka ki dang kam trai haduh mynta bad ki dang bteng ban appeal ïa ka mokotduma.
U bah B.Kharsyiemlieh u la ong ruh ba naduh ki snem ba la dep, ki riew rangbah bad ki paitbah jong kitei ki shnong, ki la ju ïakynduh lang man ka por ban ïatai na ka bynta ban wanrah ïa ka shongsuk shong saiñ bad ka jingïalong shitylli ha baroh ki liang. Hynrei katei ka longkmie bad katto katne ki longïing ba kyrshan ïa ka, ki la ong pynban ki mawjynthut ym tang ïa ka shong suk shong saiñ, hynrei ïa baroh ki kam pynroi kiba ka sorkar ka ai na ka bynta ka jingmyntoi jong ki paitbah.
U la ong ruh ba ka long kaba sngewsih ba wat ïa ka skhim MNREGS ruh katei ka longkmie kam shah ban pyntrei hapoh shnong. U la ong ba ïa katei ka longkmie wat ki bor ka aiñ ruh imat ki shem jingeh ban pynshitom, wat lada ka pynthut katto katno ïa ka shong suk shong saiñ jong ki paitbah ruh.
