Kiwei wat hadien lai snem ba buh mawnongrim pat sdang ka kam, hangne pat da khongpong
Saw tylli ki projek pyllait u Myntri ha Lummawbah

Shillong, Risaw 04 : U Myntri ka tnad Soil and Water Conservation ka sorkar jylla ba dei ruh u MLA ka Mylliem, Bah Hamlet Dohling ha ka sngi Ba-ar u la ong ba ha kiba bun ki jaka wat hadien lai snem ba buh ïa u mawnongrim bunsien ym pat ïohi dak ïa ka kam ban sdang hynrei ha Mylliem pat katei ka long markhongpong.
Haba kren ha ka jingïalang kaba long ha Lummawbah ha katei ka janmiet, utei u MLA u ong ba kum u nongmihkhmat um ju sngewtynnad satia ban shu leit buh ïa u mawnongrim khlem pat ïohi ba ka kam kan sdang shwa.
“Peit hangne ka kam ka la dep 75 persen ngi dang buh mawnongrim bad kaba sah ban pyndep ka long sa tang 25 peersen.,” u la ong. Haba jubab pat halor ka jingkyrpad jong ki nongïalam shnong ka Lummawbah ban pynheh shuh ia katei ka iingskul jong ka Government LP School Lummawbah khnang ban ïoh kamra na bynta ki nonghikai, ki jaka shongkai, bad ruh ka jaka leitbar na ka liang u Bah Hamlet u la ong ba mynta um nud shuh ban kular namar ka por ka samoi treikam ka sah sa kumba lai bnai ei ei.
“Tangba lada ym leh manga mano ban leh bad mano ban ïohi ïa kine ki jingdonkam ha shnong. Kumta haba ka shnong ka ieid bad kyrshan ka don ka jingkyrmen ba ngan nang lah ban leh shuh shuh,” u la bynrap biang.
Shwa kane, u Bah Hamlet u ong ruh ba dei tad ynda u la jop kum u MLA u sa tip ba ka don ka skul sorkar ha shnong bad dei lyngba ka jingpyntip bad ka jingïai bteng jong u Rangbah Shnong bad Secretary Shnong ba ki la ïoh lad ban mang pisa na ka bynta ban tei thymmai noh da ka iing skul kaba pura.
“Kane ka skul ka la noh synñiang shibun na ka bynta ki nongshong shnong bad halor kane ka bynta nga sngewnguh ïa ki nongïalam shnong kiba la buddien namar ka jingeh ban pynlong skul ha kajuh ka jaka ba ki pynlong skul mynta,” u la ong da kaba pyntip ba na ki saw tylli ki skul ba u pynïoh na ka bynta ka constituency, kawei u la mang khnang na bynta ka Lummawbah ha ka dor kaba 40 lak tyngka.
Haba pyntip pat ïa ka jingtrei ba jar jar kaba u trei ryngkat bad ki nongïalam shnong, u Bah Hamlet u la pyntip ba ka Lummawbah ka la don mynta haduh lai tylli ki tyllong um, kata ar tylli na ka tyllong ha Umpaitmaw bad kawei pat hajan ka jaka tan um ha Laimer Shiteng. U la ïathuh ruh ba mynta kiban ïoh um ha ki iing ki sem lyngba ka skim JJM ki la don haduh 500 tylli ki longiing. Ki projek kiba u MLA u pyllait ha katei ka sngi ki kynthup ruh ïa ki projek jong ka tnad Soil & Water Conservation kata ka jaka pynlang um ba donlang bad ka jaka sam um kaba don ha Sangmeiñ, nangta ka jingkieng ïaid kjat ha Dong Sohra bad ruh ka jaka pynlang um ha Lummawbah. Ha kane ka sngi, u Myntri u la aiti ruh ïa ki kor computer sha ka Lummawbah Government Lower Primary School.
Ha katei ka jingïalang, u MLA u la pynbna ruh ba shen tang shu kut ka Puja un sa phah siang rong noh ïa ki surok kiba la duh kiba don ha ka shnong Lummawbah.
Ha kane ka sngi la ïoh ruh ïa ka jingkren na i Director ka tnad Soil and Water Conservation, Kong I Rynjah, nangta na u Secretary Shnong Bah Arju Dkhar bad ruh na u Rangbah Shnong Bah Everet Thangkhiew. La donlang ruh ha kane ka jingïalang da ki nongkitkam shnong nalor ki nongshong shnong jong ka Lummawbah.