Kiwei ki shu pyrta ki shukor ha surok, ka UDP ka ladep leh da ki kam, ong u Bah Paul ha Umroi

Nongpoh, Rymphang 12: Haba pan jingkyrshan na ki paidbah ka Umroi Constituency ban pynjop ïa ka kyrtong ka UDP na Umroi Constituency, ka Kong Naphisha Marwein ha kane ka election MDC 2025, u Bah Paul Lyngdoh kum u Working President ka state UDP, u la ong, “Kiwei ki la shu pyrta bad shukor tang ha ki surok ne ki jaka paidbah bad ka UDP ka la dep ban leh da ki kam ban pynkhlaiñ ïa ka la jaid bynriew”.
U Bah Paul Lyngdoh kum u nongïalam ka state UDP u la hiar mynta ka sngi sha Umroi, na ka bynta ban ïalap elekshon kyrpang ïa ka kyrtong ka UDP kaba la pynlong ha Bhoirymbong bad ha kane ka jingïalang u la pan ka jingkyrshan kaba radbah na ki paidbah ka Umroi Constituency ban pynjop ïa ka samla Naphisha Marwein bad da kaba ïaroh ruh ba ka la dei kawei ka samla kaba pyni ïa ka jingtbit ha ka kam nongïalam kumba ka la don bynta ha ka jingshakri ha ka Youth Wing ka UDP party.
U la la kren ruh halor shibun ki kam ba ka party UDP ka la lamkhmat ban ïada ïa la ka ri bad ka jaid bynriew, kawei na kata, u la pynpaw ba ka UDP ka la ïakhun ban pynrung biang ïa ki 5 tylli ki shnong ha Sor Shillong ban hap hapoh ka jingpeit jingkhmih ka KHADC.
U la ong ruh ka UDP party ka la don bynta kaba khraw ban shna ïa kita ki aiñ ba pyrkhing kiba ïada ïa ka khaïi ka pateng ki trai muluk ki trai jaka na ka jingshah ktah ha ki nongkhaïi kiba wan na shabar ka jylla. Ka UDP ka leh shibun ban shakri na ka bynta ki trai muluk ki trai jaka kum ka jingpyntreikam ïa ka building bye laws ka KHADC, ka Land Act, ka jingïakhun ban pynduh ïa ki jingpyndonkam ïa ki plastic kiba ktah ai ka mei mariang bad kaba sngewsih kiwei ki nongïalam kiba wan tang ha ka por elekshon ki shu pyrta bad shukor ha ki jaka paidbah tang ha ka por elekshon, u la ong.
U la bynrap ruh da kaba ong, ba ka jaid bynriew jong ngi, ka dei ka jaid bynriew kaba klet beij, bad ki klet ïa kita kiba la trei ne lur na ka bynta ka jaid bynriew bad tang shu poi ka elekshon ki ngop noh ha kita kiba wan ïalap elekshon ha ki iew bad shu pynbiej ïa ki paidbah tang da ki sur jingrwai.
Shuh shuh, u la pynpaw ruh da kaba ong ba ka UDP ka la dep leh shibun ki kam ban ïada ïa ka jaid bynriew bad kan dang ïaid bteng ban shakri ïa ki paradoh ki parasnam bad ka party UDP kam dei kata ka party kaba shu wan ïalap elekshon tang shuwa ka elekshon bad ka la dei ka party kaba la lur bha ïa ki kam kiba ka ïada ne shakri na ka bynta ka ri bad ka jaid bynriew, u la bynrap.
Ha kane ka sngi, nalor kiwei ki nongïalam kiba la ai jingkren, ka Samla Naphishisha Marwein ruh ka la ïa jingkren ban pan ka jingkyrshan na ki paidbah ka Umroi Constituency bad ka la kular ruh ba lada ki paidbah ki kloi ban pynjop ïa kane ha kane ka elekshon kan long kata ka samla kaba kren ïa ka jingeh ka jaid bynriew hapoh katei ka ïing Dorbar thaw aiñ ka KHADC.