Ther u Dy CM ia u Dr Mukul halor ka jingleh politik ban pynkynriah ïa ka Block Head Quarter

Shillong, Rymphang 12 : U President ka NPP ha kane ka jylla bad Symbud Myntri Rangbah u bah Prestone Tynsong mynta ka Sngi Balang u la ther tyngeh ïa u Dr Mukul Sangma uba ïalam ïa ka sorkar ba mynshwa kum u Myntri Rangbah halor ka jingleh politik jongu ban pynkynriah ïa ka head quarter jongka Community Rural & Development (C & RD) Block na Wahbung sha Lumshnong bad dei ruh kane ka daw bah daw san ha lyndet ka jignshim rai jongu ban mih noh na ka Congress bad pynïasoh noh bad ka NPP bad hadien ba jop bad ioh bat ka NPP ïa ka jingsynshar ha ka sorkar jylla sa pynkylla biang ïa ka rai ban wanrah ïa ka Head Quarter ha Wapung.
U lakren ïa kane ha ka rynsan ïalap elekshon ban pan jingkyrshan ïa u kyrtong ka NPP uba dei ruh u MDC ba mynta na ka Musniang -Rngad Constituency u ma Phasmon Dkhar mynta ka Sngi Balang.
“ Haba nga bat ïa ka tnad C & RD ha ka por ba long Myntri Rangbah u Dr Mukul Sangma ngi la dep pynmih ka jingpynbna ba ka Head Quarter ka Block kan dei ha Wapung hynrei namar ka jingleh politik jong u Dr Mukul shwa ka election 2018 kynsan kynsan u la pynmih ïa ka jingpynbna ban pynkynriah noh ïa ka head quarter sha Lumshnong. Kane ka dei ka daw bah daw san balei ba nga la rai ban mih noh na ka Congress namar kum u Myntri ka tnad C &RD nga la kyrpad ïa ki bor shnong ban ai ei ka jaka ban ïoh buh ïa ka Block Office ha Wapung” ong u bah Prestone.
“ Nga la mih noh na ka Congress tang hadien katto katne por bad pynïasoh noh bad ka NPP. Hadien ba ngi la ïoh ban bat ïa ka jingsynshar ha u 2018 hadien ka election ka sorkar ba la lam khmat da ka NPP ka la pynkylla biang ïa ka rai bad pynmih biang da kawei ka jingpybna ban buh noh ïa ka ophis jongka Block ha Wapung” ong u Symbud Myntri Rangbah.
U la ong ruh ba ka sorkar hapoh ka jingïalam ka NPP ka la lah ban wanrah bun ki kam pynroi pynpar hapoh ka jylla ha kine ki hynriew snem ba la leit noh.
Kumta u la kyntu ïa ki paid ka Constituency ba kin jied bad pynjop don burom biang ïa u MDC u ma Phasmon Dkhar. “ Nga kyntu jur sha baroh ki paid ka Constituency ba phin ailad biang ïa u ma Phasmon ba un long kum ka jingkieng hapdeng ka Constituency bad ka sorkar khnang ba phin ïoh bun ki jingmyntoi ha ka liang ka roi ka par bad ba un lah ruh ban pynurlong ïa ki jingthrang ki jongphi”. Nga kyntu ruh ïa ki paidbah ban ai ka jingkyrshan ba pura ïa ka NPP khnang ba kan ïoh thaw biang ïa ka Executive Committee ba thymmai ha JHADC ban pynthikna ba ka roi ka par kan poi sha man la ki shnong ki thaw” ong u bah Prestone.
U la kyntu ïa ki khun samla ba kim dei ban shah ïalam bakla ha ki khubor hamsaia ne ki khubor thok khubor shukor jong ki seng saiñ pyrthei. Ki lah ban kynnoh ba duna ka ïoh kam ïoh jam hynrei ka sorkar ka la leh shibun bah ki prokram kynthup ruh kum ki skill development na ka bynta ki khun samla ba kin ïoh kam ïoh jam bad ïeng ha la ki kjat. Leit ïa kynduhia ki BDO jongphi kin sa ai jingtip bniah ïa phi shaphang ki skhim bad ki ei ki jinghikai ba phin ïoh ba phin lah ban seng kam seng jam.
“ Nga kyntu ïa ki khun samla ba kim dei ban pynbijai ei ïa ka por ha kita ki khubor ïalam bakla kiba paw ha ki social media. Ka long kaei kaei kaba sngewsih ba ym don kiba kwah ban peit kiei ki jingpyntip ba ka sorkar ka ai na ka bynta ban seng kam seng jam lyngba ki social media namar ki ïa bunkam eh ban peit ïa kita ki khubor ïalam bakla ha ki social media. Leit sha ki ophis BDO ba phin ïoh bun ki jingtip kiba ka sorkar ka leh kumno ban seng kam seng jam ki khun samla jongka jylla”.