Jowai, Rymphang 12: Ka Jaiñtia Student Union (JSU) Central Body ha ka sngi Balang hapoh ka jingïalam u General Secretary samla Neilkee Mukhim ki la leit ban ïakynduh ïa ka ADC jong ka West Jaiñtia Hills District halor ka jinglong jingman kaba ki Khasi Pnar kiba dei ki paradoh parasnam ki ïa kynduh jingeh bad ka Karbi Anglong Student Association (KSA) ha kum kane ka por ba dang don ka election MDC sha JHADC.
Ka JSU ka la pynpaw ka jingpyrshah jur ïa ka KSA kiba la don jinggthmu bam pyndik ïa ka kam ïalap Election MDC sha JHADC ha ki jaka khappud bad ka jylla Assam. Da kaba ong ruh baroh shi katta kam shem mih kano ka jinghuri hura hynrei haba la don kum kine ki jingïalap Election ki briew na Assam kila sdang ban wan wad daw ban pynmih ïa ki huri hura.
Ka seng kala kren shai ba kane ka dei ka sien kaba khadduh lada jia biang kum kine ki jingeh ne shah pyndik jong ki Khasi Pnar ha kitei ki jaka Khappud, ki Karbi kin hap ban shim hi ka jingkit khlieh lada jia eiei ïa ki paid Karbi, la maham tyngeh ka JSU.
Kum ka seng kaba peit ïa ka bha ka miat ïa ka jaitbynriew kam kwah ban mih kino kino ki jingïakhajia hadpeng ki ar jait bynriew, da kaba kyntu ïa ki pait Karbi ba kin long kiba sngewthuh da ka jingïatreilang na ka bynta ban wanrah ka jingshong suk shong shngaiñ.
Ki nongïalam ka seng haka jingïakren bad ka ADC kala kular ban shikhia ïa kane ka kam bad ban wad ki lad ki lynti, khnang ban nym mih kino kino ki jingïaklumar naka bynta ka jingïaidbeit jong ka jingthep vote ha kitei ki jaka khappud.
