Shillong, Rymphang 12 : Ha ka jingpyrshang lang ban wanrah ïa ka jingshngain ha ki jaka ba hap ha ka jingpeit jong ka Cantonment Shillong, u Mission Director DREAM mission, ryngkat ka jingïatreilang bad u Superintendent of Police (SP) jong ka East Khasi Hills (EKH), ki la ïakynduh ïa u CEO jong ka Cantonment Board, Shillong, u Ayush Maurya, ha ka 11 tarik mynta u bnai.
Ha ki jingïasyllok, la mynjur ba yn pynlong ïa ki jingïalang lang man ka por, bad ban peit bad bishar bniah lang na ka bynta ban pynbeit ïa ki jingeh kiba don mynta ban wanrah ïa ka jingshngain. Kane ka sienjam ka long ban wanrah ïa ka imlang sahlang kaba shngaiñ na bynta baroh ki nongshong shnong.
Ka bynta kaba kongsan jong ka jingïakren ka long eh halor ka jingïohlad ban pynlong ktem ban leh ïa ki kam bymman. La kdew ruh ba namar ba ki jaka jong ka Cantonment kim hap ha ka jingpeit jong ka Dorbar Shnong kumta ka la buh jingeh bha. Kumta, la rai ba kan don noh ka jingtreikam kaban tehlakam ïa ka ïaid ka ieng jong kito kiba i suba ha kine ki jaka.
La rai ruh ba na bynta ka jingshngain lang jong baroh, yn sa buh noh da ki kor CCTV ha ki jaka ba kham long pdeng kiba hap ha ki jaka jong ka Cantonment. Kane ka long ruh kum shi bynta ban tehlakam ïa ki kam bymman bad pynkhlain ruh ïa ka jingshong shngain. Nalorkata, la khmih lynti ba ka jingpynkhlain ïa ka jingpeitngor kan don ka bynta kaba kongsan ha kaba ïada na ki kam beain, khamtam eh ïa ki mat kiba iadei bad u drok, kiba long ka jingeh kaba nang kiew ha ka thain.
U Mission Director ka DREAM Mission u Bah F Kharshiing u la pynpaw ïa ka jingsngewnguh ïa u CEO ka Cantonment Board, Shillong uba la sngewkhia ïa ki jingeh ba ïadei bad ka jingïada kiba la pynpaw bad ai ka jingkyrshan kaba pura ïa ki lad ki lynti ba la ai jingmut. U la ong ruh ba kane ka jingïatrei lang ka pyni ïa ka sienjam kaba kongsan ha ka jingpyrshang ban pynthikna ïa ka nongbah Shillong kaba shngain.
