Kitbok kitrwiang ka KSU South West Khasi Hills District ïa u samla ban leit ïalehkai MTW C’ship 2022 ha Dubai

Mawkyrwat, Jymmang 24: Ka Khasi Students’ Union (KSU) jong ka South West Khasi Hills District mynta ka sngi ka 24 tarik u Jymmang, 2022 ka la pynlong ïa ka jingïalang kitbok kitrwiang ïa u samla Skhemborlang Marweiñ uba dei u samla na ka shnong Nongtrai ban leit ïashimbynta sha ka Muay Thai World Championship (MTWC) 2022 ka ban sdang naduh ka 26/05/2022 haduh ka 04/06/2022 ha Dubai (UAE).
Ïa kane ka jingïalang la pynlong ha ophis KSU Central Body ha Jaiaw, East Khasi Hills District ha ka jingïadon ryngkat lang jong ki nongïalam ka KSU South West Khasi Hills District bad ki dkhot bad nongïalam ka KSU Nongtrai Unit.
Haba kren ha ka jingïalang na ka liang u Forwardman Nongrem, President ka KSU South West Khasi Hills District u la pynpaw ïa ka jingsngewsarong ba na ka por sha ka por ki samla ki la nangkiew ha ka jingïalehkai sports ban pynpaw nam ïa lade bad ïa ka Jaidbynriew sha ka pyrthei baroh kawei.
Ha kajuh ka por u la kyntu ruh ba ki samla don sap ki dei ban minot thop namar kam don kano kano ka lynti ban poi suk ne ka short cut ban poi sha ka thong hynrei ki poi beit tang ki briew ba don ïa ka mynsiem minot thop. “Ka sap kam lah ban thaw pyrthei khlem ka jingtrei shitom”, ong u bah Nongrem. Namarkata, kum ka seng ka kyntu iï ki samla don sap jong ka Jaidbynriew ba ki dei ban trei shitom ban pynpaw nam ïa lade bad ïa ka Jaidbynriew ha khmat ka pyrthei.
Ha kane ka sngi na ka liang jong ka seng ka la ïoh ruh ban noh synñiang da ka song pisa sha une u samla u ban mih la shai ka sngi ban leit ïalehkai ha ka Muay Thai sha Dubai.
Ïa ka jingïalang lyngkot la pynïaid da u samla Evansroy Nongrem, Education Secretary KSU South West Khasi Hills District bad la ïoh ïa ki jingkren kitbok kitrwiang na u samla Episcopal Lyngdoh, Asst. Education Secretary KSU South West Khasi Hills District, na u samla Dusterwell Kharlyngdoh, Finance Secretary KSU South West Khasi Hills District.