Kitbok bad ai mynsiem ka RBDSA sa ki rang bad thei ïalehkai Athletic na Ri-Bhoi shuwa ban leit sha Meghalaya Games ha Tura

Nongpoh, K’Lyngkot 13: Ka Ri-Bhoi District Sports Association (RBDSA) mynta ka sngi kala ai ka jingkitbok kitrwiang ïaki samla ïalehkai Athletic ka Ri-Bhoi District kynthei bad shynrang shuwa ba kin mih naka district ban leit ïa shimbynta sha ka Meghalaya Games 2024 ka ban long ha Tura haka jingïalang ba lyngkot kaba la long ha ophis u DTO ha Nongpoh.
Ha katei ka sngi la wan ruh ban pynshit pynshngaiñ lang da ka jingdonlang u Bah Balajied Ranee MDC ka Nongpoh, Bah RB Shadap President ka RBDSA, Bah GS Shadap General Secretary bd kiwei kiwei ki official jong ka RBDSA.
Ki nongïalam jong ka RBDSA ha katei ka sngi kila sneng la kraw ïaki khun samla ba ki dei barabor ban long ki samla kiba don ka akor ka burom, kiba tip briew tip blei ban long ruh ki nuksa ba bha sha kiwei ki samla na kiwei pat ki district jong ka jylla la ka long ka jingleh khuid leh suba nalor ka jinglehkai bha ha baroh ki jinglehkai.
Naka liang u Bah Balajied Ranee MDC ka Nongpoh haba kren ha katei ka sngi u la ai mynsiem ïa kitei ki rang bad thei ïalehkai Athletic jong ka District kiban leit shim bynta sha ka Meghalaya Games ha Tura ba kin ïalehkai bha naduh ka mynsiem bad pyndonkam hok ïaka sap ïalehkai ban wanrah ïaka nam bad ka burom ïaka District.
U la kyntu ruh ïaki rang bad thei ïalehkai da ki kyntien sneng bad kraw ha shwa ba kin mih napoh ka district ba ki dei barabor ban long ki ba tip ïaka burom ka akor la kadei haka ktien ka thylliej ne ka riam ka beit, u la ong ruh ba ki jingpynshoi ki lah ban wan ha ki ba bun rukom hynrei kum ki samla ki dei ban long skhem ha la ka jong ka tynrai bad ban pyni ruh ïaki kam kiba bha sha kiwei pat.