Kino kino ki Party kiba synshar ha ki District Council kin ïakynduh mawsiang lada kim ïoh jingkyrshan na ka NPP

By Mawphor Editor On Dec 6, 2024

Shillong, Nohprah 5 : Ka Nongïalam jong ka National Peoples Party (NPP) kaba dei ruh ka Myntri Sorkar ka Dr Ampareen Lyngdoh mynta ka Sngi Palei ka la ong ba kan long kaba eh ne ïa kynduh mawsiang ïa kano kano ka party ka ban thaw ïa ka Executive Committee (EC) bad synshar ha ki District Council bad kin ym lah ban leh ei ei ne poi shano shano ruh lada kim ïoh ka jingkyrshan bad kyrkhu na ka seng NPP kaba ïalam ïa ka jingsynshar ha ka sorkar jylla.
Haba ïakren bad ki lad pathai khubor, ka Dr Ampareen ka la ong “ Ngam pat lah ban sngewthuh kaei ka lyer jongka election MDC. Hynrei tang kawei ka long, lah ban wan ne thaw EC da kano kano ka party ha ki District Council hynrei lada phim ïoh jingkyrshan bad kyrkhu na ka NPP kan ïa kynduh mawsiang ban poi sha kano kano ka jingthmu. Kata ka dei ka lynti ba ka saiñ pyrthei ne ka politik ka ïaid”
Haba ïathuh ba ka NPP ka la pynkhreh bha na ka bynta ka election MDC ban wan ka Myntri ka la ong “ Kumba ju long ha kiwei kiwei ki election balei ngin ym pynleit jingmut ha ka MDC election ruh bad kum ka party ngi la pynkhreh bha. Kin don ki jingïakhun namar ym ju don election hi khlem ïakhun pyrshah? Kumno ka result kan long ngim tip namar ngim dei ki nongïathuh lypa ne ki pandit ban tip lypa ïa ka ban wan”.
Ka la ban jur ruh ïa ka jingdonkam ïa ki dkhot ne ki player jongka party ban trei shitom bad pyni ïa ki kam kiba ki trei shwa ka election.
Ha kawei pat ka ling ka Myntri ka la kren bynniaw halor ka report card ne ki kam ba la pyni ha u 2018 bad 2023 namar ki la mih noh na ki jingkhang ïit namar ym don shuh ba kynmaw ne ïohi kaei kaba ki MLA bad MDC ki leh na ka bynta ka constituency jongki namar kata ka lyer jingsngew ne mantra ka la ïoh ban ïalam bakla ïa ki paidbah. “ Kumta ngam tip la ki paidbah kin kynmaw ne em kaei kaba ki MLA bad MDC ki leh na ka bynta jongki” Ngam tip la ki la bishar bniah ne em kaei kaba ki MP ki leh na ka bynta jongki ne ki khlem leh na ka bynta jongki. Imat baroh baroh la ïa shah tyllep da kata ka jingsngew bad ngam tip la kane ka lyer kan dang ïai bteng bad pynmatlah lut ïa baroh hynrei kynmaw tang ka por kan sa batai”
Haba pynkynmaw ba ka sorkar MDA kan dang ïoh synshar sa lai snem kumta ka Dr Ampareen ka la ong “ Kynmaw wat kheiñ dew thala ne wat ym leh bym suidñiew ïa ngi. Kam pher aiu kan jia ha ki Election District Council phin ym lah ban kyrda lada phim don ka jingïadei bad ka sorkar kaba synshar ïa ka jylla”.
“ Ka synshar paidbah ha India ka long borabor la synshar da kiei kiei kiba phim ju poi pyrkhat. Kam ju lei lei kaei kaba la leh ruh. Ki paidbah ki shah ïalam bakla bad nga kyrmen ba ngan ym ngat ha kata ka apot jongka jingshah ïalam bakla da ki jingsngew. Nga kyrmen ba ki paidbah kin kynmaw ïa kaei kaba nga la leh na ka bynta jongki, kaei kaba nga la pyrshang ban leh ïa kaba bha tam wat teng teng ki pulom ruh. Ka long kaba bha ïa ngi ba ngin leh ïa kaba bha tam na ka bynta ki paidbah kiba bishar bniah borabor ïa ngi. Teng teng ka long kaei kaei ka bym don jingïasnoh bad ka kam ruh, kaei kaei ka bym ïasnoh bad ki jingshisha hynrei ka ïalam bakla pat ïa ki nongthep vote. Kane keiñ ka dei kata ka saiñ pyrthei ba itynnad ha India” ong ka Dr Ampareen.
Haba ïaroh ïa ki jingtreikam jongka NPP ka Dr Ampareen ka la ong “ Ka saiñ pyrthei ha India ka long kham pher bha, phim lah ban tip lypa kaei ka ban jia. Ngan ym kren ïa kiwei kiwei ki seng saiñ pyrthei lait noh tang ïa ka NPP. Ngi la trei bha ïa ki kam ba bha. Ngi la pyndep ïa ki kam kiba sah teng da ki bun bun phew snem. Ngi pyrshang ban pyniajan bad ki paidbah khamtam u Myntri Rangbah uba nyngkong ban hiar da lade ban ïakren bad ki paidbah hangno phin shem kum une u Myntri Rangbah uba pynrit ïa lade ban hiar bad ïakren bad ki paidbah lyngba ka prokram CM Connect. Phi la ju ïohi ne lah ju don? Ngam pat ju ïohi haduh mynta”.