Shillong, Naiwieng 05 : Ka jingphriang stet ki khubor ba ka elekshon MDC ha KHADC bad JHADC kan sa long noh ha u Rymphang-Lber 2025 ka la pynlong ïa ki MDC ba mynta ba kin khihwin bad klumar lut bad kane ka la jia kumjuh wat ïa ki kyrtong kiba pynkhreh ban aireng ha kane ka elekshon.
Ki katto katne ki MDC ka KHADC haba kren bad ki lad pathai khubor ki la ïathuh ba watla haduh mynta kim pat tikna ba ka elekshon MDC kan sa long ha u Rymphang-Lber jong u snem ban wan hynrei ka jingkhihwin kiwei pat ki paralok ka la pynshongshit lang ïa baroh.
“Baroh shi katta ngi ap ba ïoh ka Sorkar Pdeng ka wanrah ïa ka Jingtyrwa pynkylla thymmai ïa ka Khyrnit ba Hynriew ha Parliament ha kane ka Dorbar Tlang. Lehse dei tang hadien ba la kut ka Dorbar Tlang ba kine baroh kin sa shai lut,” ong uwei na ki MDC.
Katba uwei pat u MDC u la ong ba mynta jan baroh ki MDC ki la shongshit lut na bynta ka elekshon bad bun ki la pynlut ïa ka por bad ka bor jong ki ha la ki constituency ïoh kumno re kumno kam don shuh kano kano ka jingpynkylla hadien ba ka samoi treikam ba la shu pynjlan ka la kut noh shwa u Lber 2025.
“Kum ki nongmihkhmat paidbah ngi hap ban pynkhreh lypa ïalade namar ngim lah ban tip lypa ïoh lehse ka elekshon ka long shisha ha u Rymphang – Lber, kan eh bha ïangi ban leit ha ka minit kaba khatduh sha ki paidbah,” u la ong.
Haba kren pat halor ka jingbeh bha ka lyer VPP ha kane ka elekshon, don ki MDC kiba pynpaw da kaba ong ba kane kadei ka jingïakhun kaba kham pher na ki elekshon kiba la dep ha ki khyndiat snem.
“Dang ha ki 5-10 snem mynshwa ka lyer elekshon MDC ka ïapher lada nujor bad kane ka kynti ba mynta. Ngim lah ban tip na kano ka daw tangba ngi ïohi kylleng ba ki briew ki kren beit shaphang kata ka lyer jingkylla. Lehse tad haduh ynda la pynbna ïa ka tarik elekshon bad haduh ban da la dep ñiew vote ngin sa tip,” bynrap sa uwei pat u MDC.
Haba jubab halor ka jingkylli, u la ong ba kum u nongmihkhmat paidbah u trei kumba ju leh baroh kine ki 5-6 snem bad kumta u hun beit ïa ka rai kaba ki paidbah ki ai lada ka elekshon ka wan ha kano kano ka por ruh.
Na ka liang katto katne ki Executive Member ba mynta ki la pynpaw ïa ka jingsngewskhem ba mynta ki la nud ban leit sha u paidbah ban ai ïa ka jingkheiñ kaei kaba ki la leh na bynta ka Jaidbynriew da kaba buh hakhmat ïa ka jinglah ban mynjur bad pynlong aiñ ïa kiba bun ki Bill kiba la sahkut baroh shi katta ha ka District Council Affairs bad ruh wat na ka bynta kito ki Bill kiba thymmai.
Ki la kam ruh ba dei tang ha kane ka samoi ba ka Executive Committee ka la lah shisha ban leh shibun na ka bynta ka jingmyntoi jong ka Jaidbynriew khamtam eh haba wanrah ïa ka aiñ la ka long na bynta ka khyndew ka shyiap,na bynta ka ïew ka hat bad khamtam eh ka jingpynkup bor ïa ki Dorbar Shnong, Dorbar Kur, ki Seng Longkmie, ki Seng Samla bad kiwei kiwei ki aiñ kiba dei na ka bynta ban pynkhlaiñ ïa ka jingtreikam katkum ba la pynkup bor da ka Khyrnit kaba Hynriew jong ka Riti Synshar jong ka Ri.
Jan baroh ki seng saiñpyrthei mynta ki la shongshit lut pynithuh kyrtong la ka long naduh ka VPP, bad la ïohi ruh ba ka NPP, Congress bad kiwei kiwei ki party ki la pynkhreh shaid shaid ban pynbna noh ïa ki kyrtong.
