Shillong, Risaw 20: Ka ding kaba klang ka la bthei ha kawei ka Canteen kaba don hapoh ka jaka pule jong ka skulbah North-Eastern Hill University (NEHU) ha ka step jong ka sngi Ba-ar, ha kaba ka la bam duh syndon ïa katei ka dukan bad ka la pynjulor jur ïa kawei ka jaka die marbam hajan ka Gate No. 3.Halor kane ka jingjia ym shym la don kiba mynsaw.
Katei ka jingpluh ding, ka la jia ha ka por 11 baje mynstep, ha ka canteen, kaba don ha ka mala ba nyngkong jong katei ka complex.Katkum ka jingong jong u trai dukan, katei ka jaka ka dang plie ha katei ka por, bad ki nongtrei ki la pynkhreh ïa ki jingbam thiang bad ki dang buh ïa ki ha ka counter na ka bynta ka jingdie sngi haba ki la iohi ïa ka jingpluh.
U trai u la ong ba ym shym la don kano kano ka jingshet jingshet ha ka por ba sdang ka ding ka la sdang pluh bad u la suba ba ka dei ka jingbthei jong ka LPG cylinder.
Watla ka skulbah ne ka tnad pynlip ding kim shym la pynthikna thikna ïa ka daw, hynrei ki nongsakhi bad ki nongtrei ha ki dukan ba marjan ki la iathuh ba ki la iohsngew ar tylli ki jingsawa kaba jam shwa ban iohi ïa ka jingpluh ding.Ki la suba ba ki jingsawa ki dei na ka jingbthei jong ki tyndong LPG.
Ym shym la don ki nongthied hapoh katei ka jaka ha ka por ba ka ding ka la pluh. La ïathuh ba ki nongtrei jong ki dukan ki la pyrshang ban pynlip ïa ka ding da kaba pyndonkam da ki tiar pynlip ding, hynrei ki tiar kim shym la treikam.
Ka ding ba klang ka la bam duh syndon ïa ka dukan die marbam bad ka la pynjulor jur ïa ka jaka, khamtam eh ïa ka tnum jong ka, kaba bun na ki la shah pynjulor.La ngeit ba ki dieng ba la shna ha ki bynta jong ka tnum ka la pynlong ban pur stet ka ding.
Ha katei ka jaka don lai tylli ki restaurant, ka ATM, ka dukan stationery, ka dukan khap shniuh bad katto katne kiwei pat ki jaka khaii.
Ki pulit pynlip ding mar mar kila leit shakatei ka jaka bad ki la lah ban tehlakam ïa ka jingpluh ding.Ka jingjulor jong ka dukan die marbam la antad ba ka long kumba 20 lak tyngka, katba ka jingduhnong baroh kawei ïa ka complex bad kiwei kiwei ki jaka treikam ka dang sah ban khein.
Ka tnad pynlip ding ne ka NEHU kim shym la pynmih kano kano ka jingpynbna kaba shai halor kane ka jingjia ha ka por ba ai ïa kane ka kaiphod.
