Shillong, Risaw 20 : Khyndiat sngi hadien ba sa lai ngut na ki saw ngut ki MLA ka UDP ki leit ban pynïasoh noh sha ka NPP, na ka liang u nongïalam ba rangbah ka BJP u Bah AL Hek u la mih shakhmat ban ai mynsiem ïa u President ka UDP Bah Metbah Lyngdoh ba um dei satia ban duh mynsiem hynrei ban pynkhlain arshah ïa ka party nangne shakhmat.
Lah ban kdew hangne ba ka UDP kaba jop haduh 12 ngut ki MLA ha ka elekshon MLA ha u snem 2023 mynta ka don sa tang uwei u MLA ba dei ruh u President ka Party Bah Metbah Lyngdoh hadien ba 11 ngut na kine ki la leit ban kyntiap noh sha kawei ka seng.
Dang ha u bnai ba la dep haduh 8 ngut ki la leit ban pynïasoh noh sha ka BJP bad ha kane ka sngi Nyngkong pat lai ngut kiwei pat kiba dang sah ki la leit ban pynïasoh sha ka NPP.
Haba kren halor kane ka jingjia, u Bah Hek u la ong, “Nga ai jingïaroh ïa u (Bah Metbah). U ïeng ha la ki jong ki nongrim bad ki jingngeit jong u. Kumta u dei ban bteng ban pynkhlaiñ ïa ka party UDP.”
“Ha kine ki sngi, baroh ki la mih noh na ka UDP, hynrei nga kyntu ïa baroh ki nongtrei jong ka party bad ïa u President ka party ha ka jylla ban ïaineh ha ki nongrim. Ka saiñ pyrthei ka lah ban kylla ha kano-kano ka por,” u la bynrap.
Da kaba kam ba u Bah Metbah u dei u paralok bajan jong u, na ka liang u Bah Hek u la ong, “Ngi la ïatreilang la bun snem. Nga kwah ba un ïaineh bad ka UDP. Ngim tip kaei kaba lah ban jia, ka UDP ka lah ban ïoh bun ngut ki MLA ha ki sngi ban wan.”
Shuh shuh u la ong, “Nga kitbok kitrwiang ïa u paralok jong nga, Bah Metbah Lyngdoh. U dei ban ïeng skhem kumba u ïeng mynta.”
Haba kylli halor ka lynti ban ïaid shakhmat jong ka UDP, une u MLA ka Pynthorumkhrah u la ong ba kata kan shong ha ka rukom treikam jong ka party bad ki nongïalam jong ka.
“Lada ki pynkylla ïa ka rukom treikam bad wanrah ïa ki nongïalam kiba biang ban ïakhun ïa ka elekshon na ka tiket UDP ha u snem 2028, ym don ba lah ban khanglad ïa ki,” u la ong.
