Nongstoiñ, Jymmang 6: Ka jingkiew jong ki kam sniew ha kine ki sngi ha kylleng ki jaka hapoh ka jylla, ka la pynsyier bad pynsheptieng ïa ki paidbah ym tang ha ka leit ka wan hynrei wat haba ki shong tang hapoh shnong poh thaw ruh.
Ha kaba ïadei bad ka jingkiew sted jong ki kam sniew kum ki kam bat bor, rah bor bad pynïap, ki kam tuh kam lute bad kiwei kiwei, u nongthoh khubor u la ïoh ban ïakren bad uwei u heh Pulit jong ka West Khasi Hills u bym kwah ban pynpaw kyrteng ïalade, ha kaba u la ong ba ki riew runar ha kine ki sngi kim salia shuh ban leh ïa kino kino ki kam sniew kiba ka dohnud jong ki ka kwah wat ha ka por mynsngi mynshai ruh bad kim salia shuh ïa ki rangbah shnong bad wat ïa ki pulit ruh.
U la ong ba ka jingbym sheptieng shuh jong ki runar ïa ki pulit, ka dei ba haba ki pulit ki la ïoh ban kem kim nud shuh ban shoh ban dat ïa ki wat lada ki leh ïa ka kam sniew kaba shyrkhei katno katno ruh. Nalorkata u la ong ruh ba ha ki por ba mynshuwa ka bam ka dih, ka dawai ka dashin ïa kito ki runar kiba la shah kem ka sorkar kam pat pynbiang satia.
Kumta haba ki runar ki la shah set along ki shem jingeh bha bad kim sngewtynnad satia ban shong hapoh along. Ha kine ki sngi ki don ki riew runar kiba kmen haba shah kem ha ki pulit, namar ba ynda la set ha along la hap ban pynbiang naduh ka sha step, ka ja step, ka sha sngi, bad ka ja miet. Nalorkata ar sien haduh lai sien shi sngi hap ban ïalam sha Hospital ban phah check up.
Ki don katto katne ngut ki runar kiba la shah kem ha kaba ki la ong ba haba kim pat shah kem ha ki pulit kim ju poi satia sha Hospital bad kim ju poi pyrkhat ban da phah check up ïa ka jingkoit jingkhiah. Hynrei haba ki shah kem ha ki pulit pat shiphang shiphang ki la shah ïalam sha Hospital, ka dawai ruh ïoh ei khlem siew pisa.
La ong ruh ba ki riew runar ha kine ki sngi wat ïa ki rangbah shnong ruh kim ju salia shuh, namar ba ki tip ba lada ki shah kem ha ki bor shnong ruh kim nud ban shoh ban dat, namar ki tip ba lada ki pulit ki tip ba ki paidbah shnong kiba kem ïa ki riew runar bad lada ki shoh ki dat, kin ym shah satia.
La ong ba ka jingpyrkhing palat jong ki bor jong ki ïingbishar ïa ka tnad pulit ha kaba ïadei bad ki runar kiba shah kem, ka pynlong ïa ki riew runar ba kin sngew muja pynban haba ki leh ïa ki kam sniew. Nalorkata ki don sa kiwei pat ki jaid briew kiba sngew tynnad ban shong kum ki koidi, namar ba ki dei ki briew kiba jai tuh ban trei shitom la ka dei ha ka bylla ka sngi ne ka rep ka riang, hynrei ki kwah ban shu im pahuh pahai bad ban ïoh ïa ka bam ka dih.
Dei na katei ka daw ba haba ki shong kum ki koidi ha ki Jail bapher bapher, ki sngew muja bha namar ka sorkar ka la pynbiang lut nadong shadong bad kim donkam ban da trei shitom kumba ki don ha la ki shnong ki thaw jong ki.
