Shillong, Ïaiong 09 : Ka jingkiew kynsan ka jingshit ha nongbah Delhi nalor ka jingdon lypa ka lyer khluit ka la pynlong ïa ka sorkar Delhi ban bthah ïa ki paidbah ba kin peitngor ïalade bad ba kin pyrshang ban shong ha iing khnang ban kiar na ki jingshitom kiba lah ban ïoh kum ka heat stroke.
Ha ka jingbthah sha ki paidbah, ka tnad ka koit ka jong ka sorkar Delhi ha ka sngi Baar ka la ong ruh ba namar ka jingma ba ka jingshit kyrpang ka sngi ka lah ban nang jur kumta ka don ka jingsyier ba ka lah ban ktah ïa ka koit ka khiah jong ki paidbah khamtam eh ki khunlung khynnah, ki longkmie armet bad ruh kito kiba hap ban trei ha ki jaka bym don jingda.
Kane ka jingmaham kadei ruh ïa kito ki briew kiba la don lypa ka jingshitom ha ka met.
Ka Delhi ka la sakhi ïa ka jingjur ka lyer khluit kaba jur mynta ka kynti namar ha ka sngi Nyngkong ka jingshit ka la kot sha ka 40 degree tam. mynta ka nongbah ka don ha u lain jingmaham lane kata ka yellow alert kaba lah ban bteng haduh ka sngi Balang. Katkum ka India Meteorological Department ka yellow alert ka mut ba hap ban husiar bad bthah ïa ki paidbah ban kiar mih shabar bad ruh ban phone ïa ki jain cotton bad kiba kylluid bad ruh ba kin tap bha ïa ka khlieh.
Ki bor sorkar ki bthah ruh ïa ki paidbah ba kito kiba don dak jingshitom dei ban pynkit mardor sha ki jaka sumar.
La bthah jur ïa ki paidbah ba ki dei ban dih Shibun ka um bad ruh ïa ki soh kiba bun ka um nalor ki jingbam kiba lah ban pyntgen ïa ka met. Nalorkata la bthah ruh ba katba lah dei ban kiar ban mih shabar khamtam ha ka por 12baje mynsngi haduh ka por 3baje nohphai sngi.
