Nongstoiñ, K’lyngkot, 21: “Katba ki snem ki nang tyllun sha khmat ka jingnag jingstad ka la nangkiew bad ka jingkyrduh kam jong ki samla ka la nang jur. Ka daw bah daw san ka dei namar ba kiba bun ki samla kiba la nang la stad ki khmih lynti beit tang ïa ka kam sorkar”, ong u Bah Teibor Marngar na ka shnong Laitkseh West Khasi Hills.
“Ka sorkar ka shem jingeh haduh katta katta ban thung kam ïa baroh ki samla kiba la biang ka jingpule, namar kumba ka long mynta ba wat ki nongtrei kiba la odin lypa ha ki ophis bapher bapher ruh, ka sorkar kam shym pat la lah satia ban pynbiang katkum ka jingdonkam jong ki khamtam ïa ki nonghikai skul”, u la ong biang.
“Haba phai ha ka jingdon jong ki samla kiba la nang la stad bad ki lad thaw kam, ym lah ba len ba ki don shibun bah ki lad thaw kam lada ki samla ki don ka mon, ki trei shitom bad ki pyndonkam hok ïa ki jingdon jingem kiba u Nongbuh nongthaw u la ai lyngba ka mariang”.
U la ong, “Ka jingpyndonkam ïa ki jaka kiba itynnad ban khring ïa ki nongwan shangkai suwari, ban pyndonkam hok ïa ki jaka rep, ki kper ki phrah, ban pynkylla ïa ki jaboh jabaiñ sha ka sboh ban rep ne ki tiar ki tar ban pyndonkam ha ïing ha sem, ki long katto katne eh ki kam kiba lah ban sdang hi”.
“Ka kam rep ka dei ka kam kaba kongsan kaba ki samla haduh mynta kim pat ñiew ba ka dei ka kam. Bunsien haba ki la pyndep ïa ki jingpule, ki ju ong ba kim kwah shuh ban kyrsum ktieh ne bat mohkhiew, namar ki la dei ki babu ki sahep. Hynrei, kim pei phang satia ba ki paitbah ka jylla haduh mynta ki dang hap ban ap ïa u khaw na kiwei pat ki jylla”.
“U phan ruh na shabar, ka dohkha ruh na shabar, ki sñing, ki syiar, ki masi ban ot doh bad wat ïa u jhur u jhep ruh ka jylla jong ngi ka dang ap na shabar. Ka por ka la dei mynta ba ki samla kiba la nang la stad hapoh ka jylla, kin phai khmat sha kiwei pat ki lad thaw kam khnang ba ka jingud jingnam ba ki samla ki kyrduh kam kan jah noh” u la pynkut.
