Ki paidbah kim don ka jingsngew pyrshah ïa ka sorkar MDA namar ka dei ka Sorkar kaba treikam : Dr Ampareen

Shillong, Lber 1 : Ka kyrtong MP Lok Sabha jongka National Peoples Party (NPP) na ka Shillong Parliamentary Constituency ka Dr Ampareen Lyngdoh ka la kyntait mardor ba ki paidbah ki sngew pyrshah ïa kane ka sorkar Meghalaya Democratic Alliance (MDA) ba la ïalam da u Myntri Rangbah u Conrad K Sangma ha kane ka election MP namar ki paidbah ki ïohi ba kane ka dei ka sorkar kaba treikam.
“ Batai ïa ka jingmut pyrshah sorkar, phi la ïohi dang shen kumno u Myntri Rangbah ula wanrah ïa ka Mang Tyngka kaba dei na ka bynta ki paidbah hynrei phi dang pyrkhat ïa kata. Ngam don kano kano ka jingartatien namar kat shaba ngi leit ngi ïohi ba ka don ka roi ka par. 7 bnai mynshwa nga leit sha Rambrai ka surok ka sniew shaba palat pud bad haba nga la leit mynta nga lap ba ka surok ka la bha palat” ong ka Dr Ampareen.
“ Phai sha ki nongrep haduh katno ki la ïoh jingmyntoi mynta ban ïa kaba long mynshwa. Peit kumno ki kamai pisa bad kumno ki kyrshan ïa ki ïing ki sem jongki lyngba ki prokram bad mission ai jingïarap bapher bapher jongka sorkar ban kyntiew ïa ka rep ka riang. Kane ka pynpaw ba ka don ka jingkiew ha baroh ki liang bad haba kumta kumno keiñ yn don kata ka jingpyrshah sorkar bad ha nga hi ngam ïohi satia ïa kata” ong biang ka kyrtong ka NPP.
Haba batai ba baroh ki seng saiñ pyrthei ba ïadon ha ka sorkar MDA ki pynïeng la ki jong ki jong ki kyrtong “ Kumta ngi ïadon lang ha kajuh ka sorkar nangno keiñ kata ka jingpyrshah sorkar kan wan?” ong biang ka Dr Ampareen.
“ Phi don ka rynsan kaba paka eh ban ïatai halor kata ka phang pyrshah sorkar bad kata ka dei beit hapoh ka ïing Dorbar Thawaiñ. Haba phim wan haba la wanrah ïa ka mat, haei kata ka jingkylli ba pyrshah sorkar. Ha nga hi nga shem ba ngi la leh bha ha baroh ki liang. Nalor kata kane ka sorkar ka leh bha ha ka liang ka koit ka khiah, ka pule puthi, ha ki kam jngoh kai bad kumta ter ter. Phi ïoh sngew ïa kaei kaba u myntri rangbah u la dep pynpaw dang shen. Hato phim ngeit ba kane ka sorkar kam thaw ki lad ki lynti ban pynïoh kam ïoh jam ïa ki samla. Kiba bun ki tnad sorkar ki la hap ban pynbna ïa ki kam ba lait ban ïoh thep kam ki samla. Kumta haei keiñ kan don kata ka jingsngew pyrshah sorkar? Nalor kane bun ki lad ki lynti ba ka sorkar ka thaw ba ki khun samla kin lah ban ïeng ha la ki jong ki kjat.
Ka Dr Ampareen ka la pynpaw ba kan ym pynleit jingmut satia ha kiei kiei kiba ki nongïaleh pyrshah ïa ka ki kren ne kynthoh namar lada ka pynleit jingmut ha kine kan shu long lehnohei kata ka jingïakhun jongka ïa ka election. Hynrei kum ka briew kaba ïohi jngai bad kum ka kyrtong jongka party kan phai beit sha ka thong ban ïoh kheit ïa u soh ka jingjop.
Kiba bun ki kyrtong ki dei beit na ki seng saiñ pyrthei ba ïatrei lang ha kane ka sorkar synrop kumta baroh ki ïadon ka jingkitkhlieh halor ka jingkiew jongka jylla. Hynrei khlem pep kin don pat ki ban pyrta khlem nongrim ba ka sorkar kam shym la leh ei ei bad na ka liang jong ngi ngin ïeng skhem ha ka nongrim ban pynshisha ïa ki jingkynnoh bym don nongrim bad ka dei ha ki paidbah keiñ ki ban bishar bad ai ïa ka rai. Hato phi kwah ïa u ne ka MP ki ban ïasaid na ka bynta ki mat ba kongsan ka jylla ynda ki la jop kum ki MP ne shu ïa kawang ktieh beit para ma ngi khlem da pynshong nongrim ïa ki jingshisha. Lada phi kwah ïa ki nongmihkhmat ki ban ïasaid na ka bynta ki mat ba kongsan jongka jylla da bishar bniah namar ki don bun ki mat kiba shu ïa hylla bad pyrta ha surok hynrei kiba dei ban shim rai ka dei ka sorkar pdeng. Katno sien phi la ju ïoh sngew ba la ïatai ha ka rynsan kaba dei ne hapoh ïing dorbar thawaiñ ka ri ïa ki mat ba kongsan ka jylla, ngam tharai ba ngin ïohsngew dei na kata ka daw nga leit sha ki paidbah da kawei ka jingmut kaba shai bad kata ka long nga ïakhun na ka bynta ban rah ïa ki mat ba kongsan ka jylla ha ka rynsan kaba biang bad ba dei ban rah” ong biang ka Dr Ampareen.
Kane ka Myntri ka la ong ruh ba ki seng saiñ pyrthei kiba ïadon lang ha ka sorkar ruh kim dei ban shu kren lap lah bad kren pathar tang namar ba la bthah ïaki ban kren hynrei ki dei ban kren halor ki nongrim bad da ka jingkitkhlieh kum kiba iadon lang ha ka liang synshar.
Ka Dr Ampareen ka la ong “ Kumba nga la rai kut ban ïakhun ïa ka election bad hooid nga tip ïa ka jingjop bad jingrem kan don beit. Hynrei ka mat ba kongsan jong nga ka long nga la rai ban ieh ïa ka shuki ha ka jylla da kawei ka jingmut ba ngan leit ban ïasaid na ka bynta ka jylla ha Parliament” da kaba bteng “ Hato kata ka shuki myntri sorkar ka long kaba donkam ïa nga ha kaba kum kane ka por ba ngi ïohi kat shaba phai ki paid nongshong shnong ki don hapdeng ka jingsngew syier lyngba kita ki khana ba la pynsaphriang ha ki social media kum ka UCC, CAA, ka jing sdang duh ïa ka jingshakri Blei ba laitluid, ka jingpynbeit ïa u pud u sam, ka khaïi pateng. Kine ki dei ki mat ba kongsan bad lada ki paidbah ki sngewdei ban ailad ïa nga ha kata ka por kin sa ïohi kaei kaba ngan leh na ka bynta jong ki ha Delhi. Kumba long mynta ka nongbah Shillong kam don ka jingkieng ban pun hapdeng jongka bad ka sorkar pdeng bad ka la shu sah shrah la bun bun snem. Kumta donkam ban pynbeit noh ïa kane ban ïoh ïa ka jingkieng kaba skhem da ka jingïatrei lang u Myntri Rangbah ka jylla, ki Myntri Sorkar bad ki MP jongka jylla” pynkut ka Dr Ampareen.