Ki nongtrei ha ki karkhana ruh ki don ka hok ban ioh ïa ka EPF : Khroo.L.Pariat

Khliehriat nailur 7: U President jong ka All Jaiñtia Muster Roll Workers and Labour Union, u bah Khroo.L.Pariat haba kren sha ki pathai khubor hadien ka jingïalang ba la pynlong myn sngi saitjaiñ ha Community Hall Khliehriat West, u la ong ba ki nongtrei ha ki karkhana kum ha ki karkhana dewbilat bad karkhana coke ki don ka hok ba kin ioh ïa ka Employment Provident Fund (EPF) bad u khmihlynti ba un sa ioh ka lad ban iakren bad ki briew kiba trei bylla ha ki karkhana kiba don ha East Jaiñtia Hills District.
U la kren bad ong ïa kane dei namar ha ka jingïalang ba la pynlong ha Khliehriat West, u bah Khroo Pariat u la pynshai sha baroh ki nongtrei muster roll kiba trei ha ki tnat treikam bapher bapher jong ka sorkar kiba don ha East Jaiñtia Hills District ba ka sorkar ka la mynjur bad kular ban siew ïa ka Employment Provident Fund (EPF) bad yn siew ruh ïa ka Variable Dearness Allowance. (VDA) bad kiwei kiwei.
U la pynpaw ruh da kaba ong ba “Don ki nongñiah trok jong ki karkhana dewbilat kiba la iakhih bad sangeh treikam dang myn ha kine ki khyndiat taïew bad ka daw ka dei namar ba kim ioh ïa ka jingsiew kaba biang na ka company ba ki trei, te ngi na ka liang ka Union ngi lap ba kane ka jingiakhih jong ki nongñiah trok ka dei kaba shong hok bad ba shong nia” u la bynrap shuh shuh da kaba ong ba ki nongtrei bylla hapoh ki karkhana dewbilat bad karkhana coke ki don ka hok ban ioh namar ki ruh ki hap hapoh kata ka aiñ kaba ki khot ka Induatrial Relation Code 2020 ha kaba mynta ka sorkar India ka la pynwan lang tang hapoh kawei ka aiñ bad kata ka dei ka Labour Code.
U bah K.L.Pariat u la ong shuh shuh ba hapoh ka aiñ jong ka Labour Code ki nongtrei ki don ka hok ba kin ioh ïa ka bai bylla jong ki man la u bnai ba hap ban siew hapoh ka 10 tarik bad ki don ruh ka hok ba kin ioh ha kaba ïadei bad ka koit ka khiah, ki karkhana dewbilat bad kumjuh ruh ki karkhana coke wat kito ki class-1 contractor ki dei ban tip ïa ka aiñ ba ki nongtrei bylla jong ki ki dei ban ioh ïa ki hok ba ki dei ban ioh “Na ka liang ka Union ngi sngew ban aijingmut ïa ki nongtrei kiba ha ki karkhana dewbilat bad ha ki karkhana coke ba ki dei ban mih shakhmat ym ban shu sngap lada don kano kano ka jingeh namar ka aiñ na ka sorkar India lyngba ka Labour Code ka long ïa baroh kiba trei bylla ba kin dei ban ioh biang por ïa ka jingsiew, ka koit ka khiah bad ka pisa ba ki dei ban ioh ynda ki la shongthait” u kyntu ïa ki nongtrei baroh ba ki dei ban mih shakhmat namar ka la dei ka por ban mih shakhmat ban iakren halor kane, namar kane ka dei kata ka ban wanrah ïa ka jingshngaiñ ha ka jingim jong ki” ong u bah Khroo.L.Pariat.