Ki kynthei ki tam bun shah ïa ki shyrang ha ki kyrdan bapher bapher: Gabriel Wahlang

Nongstoiñ, Risaw 30: Ka ophis jong ka District Social Welfare Officer West Khasi, Hills District ka la ïoh ban rakhe ïa ka International Girl Child Day halor ka phang ‘The Girl I am, the change I lead : Girls on the frontlines of Crisis’. Ïa kane ka prokram kyrpang na ka bynta ki Kynthei la ïoh ban pynlong ha ka Conference Hall jong ka Nongstoiñ College.
Ha kane ka prokram la ïadonlang da ki heh ki haiñ jong ka thaiñ kiba kynthup ïa U Bah Gabriel Wahlang, MLA kum u Kongsan, ha ryngkat ka jingsynrang lang jong I Kong N.E Wanniang MSC, AC kum ka symbud kongsan, u D.Pandey IPS, Additional SP, Dr Mrs I. Mawthoh Principal Nongstoiñ College, Kong D. W Pakynteiñ DSWO, Kong I Nongbri, Bah A.K. Kharwaniang DMC, Kong I. Wahlang General Manager DCIC, Kong B. Rynjah CDPO, ki nonghikai ki khynnah skul bad ki nongtrei ka tnat Social Welfare.
La sdang ïa kane ka prokram da ka jingthung dieng ha kaba U MLA Bah Gabriel Wahlang ryngkat ka jingsynran jong I Kong D.W Pakynteiñ DSWO, ki ïoh ban thung dieng kum ka dak ban rakhe ïa kane ka sngi, nangta la bud sa da ka prokram ha Conference Hall kaba la ïoh ban kren pdiang na I Kong D.W. Pakynteiñ bad la ai ruh ïa ka jingkren halor ka jingmut jong kane ka scheme, ‘Beti Bachao Beti Beti Padhao’ (BBBP) kaba la plie ha 22 tarik u Kyllalyngkot 2015, da ka jingthmu ban khmih bad ïit bniah ïa ka jinghiar jong ka Child Sex Ratio (CSR) lane ka jinghiar jong ka jingdon ki kynthei haba ïa nujor bad ki shynrang ha kajuh ka por ban pynkup bor ïa ki kynthei bad ki longkmie ruh kumjuh.
Kane ka Scheme, mynshwa ka treikam tang ha ki 405 tylli ki Distrik, mynta la pynïar shuh shuh ïa ka rukom treikam ha kaba la kyntup ïa baroh ki Distrik jong ka Ri India lyngba ka jingïatreilang bad ki tnad sorkar bapher bapher, bad ka District West Khasi Hills ruh ka hap hapoh kane ka thup.
Ka Ophis Social Welfare ka la ïoh ruh ban jied haduh 40 ngut ki khynnah skul kynthei bad leit ïalam sha Shillong khnang ba kin shemphang da lade halor ki bynta kiba pher kiba kidei ban tip.
U Bah Gabriel Wahlang, haba ai jingkren hane ka sngi kum u Kongsan, u la ong ba katba sha kiwei pat ki Jylla ka la don ka jingshah niew beiñ ïa ki, hynrei hapoh Ri Khasi ngi long kiba donbok ba ka riti ka dustur ka jong ngi ka ladep ban pynkup bor ïa ki bad ngi da kheiñ burom nad ñiewtang ïa ki.
U da pynpaw ka jingsngewkmen halor ka jinglah ka sorkar ban wanrah ïa kine ki Vending Pad Machine, kiban ïarap ïa ki khynnah kynthei ha ka por ba ki donkam kyrkieh hapoh skul bad kan pyllait ruh ïa ki na ka jingpep skul. Ha kajuh ka por u la ong ruh ba ki kynthei ki kham tam bun shah ïa ki shynrang ha kiba bun ki bynta, la ka dei kum ki ophisar ne nonghikai.
U la kyntu jur ïa ki khynnah skul ba ki dei ban tur shakhmat, minot ha ki jingpule bad ban don ka mynsiem ban poi sha kliar ka nam, namar haduh mynta hapoh West Khasi Hills, ym pat shym la don wat tang uwei ruh u/ka MCS officer napoh ka dong ka thaiñ.
Kumta, la duk ne riewspah kam dei ban long ka daw ban poi sha kliar ka nam hynrei dei tang da ka jingtrei shitom kaba kin ïoh kheit ïa u soh ka jingjop. U la pynkynmaw ba ïalade ruh u la long u nongap masi, wat hapdeng ka jingduk hynrei u tur ïa ki rai eh rai dam ban poi sha ka thong.
La ïoh ban batai ïa ka koit ka khiah ki khynthei na I Kong I Nongbri, I ba la batai shai halor ka koit ka khiah jong ki kynthei bad kumno ki dei ban sumar ïalade bad ban kiar na ka shongkha khynnah kaba ktah ym tang ïa ka met ka phad hynrei ïa ka ïoh ka kot bad ki jingmut jingpyrkhat jong ki ruh.
U Bah A.K Kharwaniang u la batai shai halor ka jingpyndonkam ïa ka Vending Pad Machine, kane ka la long ka jingmyntoi ïa ki khynnah skul kiba la wan sha kane ka prokram, namar ïa kitei ki Vending Pad Machine yn sa sam sha ki skul, khnang ba kan long ka jingmyntoi ïa ki khynnah haba ki donkam ïa ki pads.
Kiwei pat ki prokram ha kane ka sngi ki kynthup ïa ka Signature Campaign, bad la pynphuh pynphieng shuh da ki sur sngew thiang kaba la rwai da ka kynhun Kawei Ka Sur. La ïoh ruh ban sam ïa ki VPM sha ki 25 tylli ki Skul kynthup ïa ka Nongstoiñ College, Sibsingh Memorial Higher Secondary School, St Francis Hr. Sec School bad kiwei pat ki skul.