Shim bynta shitrhem ki khynnah skul halor ki jinghikai ban ïada na ki jingshah pynjot mariang

Nongstoiñ, Risaw 30: Ka Ophis jong ka District Disaster Management Authority (DDMA) West Khasi Hills District ha ka sngi balang, ka pynlong ïa ka ‘School Mock Drill Competition’ kum ka jingrakhe ïa ka National Observation Day on Disaster Risk Reduction (DRR). Ïa kane ka jingïalang la pynlong ha Trysem Hall, ha ka jingïatreilang bad ka Civil Defense bad Home Guard, West Khasi Hills, Nongstoiñ.
Kane ka prokram ka thmu ban ai jinghikai bad ban kyntiew ïa ka jingpynsngewthuh bad jingpynkhreh jong ki samla pule bad ki jaka pule, na ka bynta ban ïada dalade ïalade ha ki por ba wan lyngshop ka mariang kum u jumai bad kiwei kiwei.
U Bah S. Marweiñ, MCS, Additional Deputy Commissioner-cum-CEO, DDMA, u la long kum u Kongsan, ha ka jingïadon lang u Bah C. Chyne, District Disaster Management Officer (DDMO), u Bah Shaining Star Lyngdoh Marshillong, DCCD, ki nonghikai, ki samla pule, bad ki Apda Mitra Volunteer.
Ha ka jingkren jong u, u Bah Marweiñ u la ban jur ïa ka jingdonkam jong ka jingpynkhreh lypa lada jia ba wan lyngshop ki bor mariang. U la ong, “Lymda ngi sngewthuh ïa ki nongrim jong ka jingpynkhreh na ka bynta ki jingjia ba sngewsih, kan long kaba eh ban ïarap ne pynim ïa kiwei pat. Ngi dei ban nang shwa ban ïada ïalade. Kano kano ka jingtip kaba ngi ïoh na kum kine ki prokram dei ban ïasam bad ki paralok, kiba haïing hasem, bad ki para marjan khnang ba baroh kin ïoh jingmyntoi ha ka por ba jïa ka jingkhih jumai”.
U la ong ruh, “Kum kine ki kam ba ïashim bynta kim pynkhlaiñ tang ïa ka jingsngewthuh, hynrei ki pynkhlaiñ ruh ïa ki lad jingïarap lang, ha kaba kut ki pynduna ïa ki jingduh ki mynsiem briew na ki jingjulor kiba wan na u jumai ne kino kino bor lyngshop mariang bad balei ba ngi donkam ban pynkhreh lypa, ka dei namar ba ngim tip lypa ïa ki jingjia bym poi pyrkhat”.
Ka jingïakop mock drill ka la ai ïa ki samla pule ïa ka jingshemphang ha ki rukom treikam ba kyrkieh, ki buit ban pynkynrïah ïa ki briew bad ki lad jingïarap ba nyngkong.
La pynkut ïa kane ka jingïalang da ki kyntien ai mynsiem na ki nongkitkam, kiba la ïaroh ïa ka jingïashimbynta ba shlur jong ki skul bad ki nongtrei mon sngewbha.
Ka KJP Higher Secondary School ka la jop ha kane ka jingïakop, bud sa ka St. Peter Higher Secondary School ha ka kyrdan kaba ar bad ka Church of God Secondary School ha ka kyrdan kaba lai.
Ïa kane ka prokram la ïoh ïa ka jingkren pdiang bad kren pynkut da u Bah C.Chyne, DDMO, West Khasi Hills District u ba la ai khublei ïa baroh ki skul kiba la wan ban ïashim bynta ha kane ka prokram.