Ki kmie ki kpa ki dei ban pynthikna ba ki khun kin don hapdeng ka met kaba koit ba khiah : BDO

Mawkyrwat, Jylliew 29 : Ka Block Programme Management Unit Mawkyrwat Block hapoh ka jingpeit ka tnat ka koit ka khiah ha ryngkat ka jingtreilang bad Mawthawpdah PHC mynta ka sngi 29 tarik u Jylliew, 2026 ka la sdang ïa ka jingai-dawai polio ïa ki khyllung kaba lai sngi kaba tip kum ka ‘Intensified Pulse Polio Immunization Campaign 2026’ hapoh ka shnong Mawthong kaba hapoh ka South West Khasi Hills District.
Ka jingsdang ïa ka jingai-dawai polio hapoh kane ka shnong ka dei ban pynthikna ba baroh ki khyllung kiba hapoh ka san snem ki dei ban ïoh ïa ka dawai polio. Namar katkum ka kaiphod ba ba la ïohlum la ïoh jingtip ba ka shnong Mawthong bad ki shnong kiba marjan, ki dei ki shnong kiba duna bha ïa ka jingai-dawai polio ïa ki khyllung ha ki snem ba la dep.
Ha kane ka sngi, la plie ïa kane ka program jong ka jingai-dawai polio da u Block Development Officer ka Mawkyrwat C&RD Block, u bah I. Lawriniang, MCS, ha kaba na ka liang jong u ruh u la ïoh ban shimbynta ban ai dawai ïa ki khyllung.
Haba bynrap ïa ka jingkren, u bah I. Lawriniang, MCS, Block Development Officer ka Mawkyrwat C&RD Block, u la kyntu jur ïa ki kmie ki kpa ba ba kin wan shakhmat ban ai dawai polio ïa ki khun jong ki khnang ba kin ïoh ïa ka jingkoit jingkhiah kumba long lem kiwei ki para khyllung kiba la pyndep ïa ka jingai dawai polio.
Kiwei de kiba la ïa donlang ki long ka Dr. C. Lamin, Block Medical Officer, Dr. Nero, WHO Consultant, u Dr. P.A. Lyngdoh, Medical & Health Officer ka Mawthawpdah PHC, Kong A. Lyngkhoi, Block Programme Manager Mawkyrwat Block bad kiwei kiwei.