Ki jingjia ha kine ki khyndiat sngi kiba la pynlehraiñ ïa ka sorkar bad ïa ka jylla hi khlem pep kan ktah beit ia kane ka sorkar MDA ba la ïalam da ka NPP namar ïa kine ki jingjia la sei madan da ki bor mariang.
Ha kaba nyngkong eh mar ïather u lapbah lyiur uba jur paw pyrthei ki jingtrei torti ïa ka ISBT ha Mawiong namar la pei um shapoh ki kamra bad haba ki nongthoh khubor ki leit jurip ki lap ba la thep da u phong hapoh bad tap da ka dewbilat nalor. Kane ka ISBT kaba la wan plie da u Myntri Kam Pohïing jongka ri u Amit Shah ha u snem ba la dep ka dang sdang ban treikam dang ha ka 1 tarik u Iaiong 2022. Hynrei mar ïa sdang treikam bad mar ïa ther u lapbah paw pyrthei ki jingtrei torti da ka kompani na kane ka jylla hi ka Dhar Construction Company.
Hadien katei ka jingjia pat na ka jingther u lapbah hiar sa ka surok ha ka Mawlai By Pass ha ka jaka ba la pynïasoh da ka jingkieng kat haduh ba ki kali ki hap ban sangeh ban ïaid.Kane ka surok ruh kaba dang dep shna dang shisnem tam ei ei mynta.
Nalor kane ki don bun ki jingjia ki jingsniew ka surok bah naduh Mawryngkneng shaduh Mookyndur, ka jingsniew ka surok ha Jowai By Pass bad ter ter. Kine ki ar tylli ki surok ruh ki dei kiba la shna da kajuh ka kompani hi. Hato haba kumne kam dei ka jingtrei torti ba jia kine kiei kiei kiba pynlehraiñ ïa ka jylla.
Ha ka step synñia jongka Sngi u Blei por 12.30 AM jraiñ twa sa ka Dome jongka ïing dorbar Assembly ba thymmai kaba ha Mawdiangdiang. Kane ka la pynkyndit ïa kiba bun ba lang namar kane ka dei ka ïing dorbar ban shong ki MLA ne ki Nongmihkhmat ki paidbah. Rajkiya Nirman Nigam ïa kane ka ïing Dorbar la tei da ka kompani Rajkiya Nirman Nigam Ltd kaba na Utter Pradesh. Lada ha ka ïing dorbar kaba thymmai ka ban thaw aiñ hapoh ka jylla ruh dang jia kumne te kumno shuh yn ïakren keiñ. Kane ruh khlem pep kan dei hi ka jingtrei torti. Hooid halor kane ka jingtwa ka Dome te ka sorkar lyngba ka HPC ka la rai ban phah tohkit ha ka IIT na kiwei ki jylla ban lap ïa ka jingshisha.
Hynrei ka jingkylli kaba mih ka long balei pat ym phah tohkit halor ka jingtrei torti ïaka ISBT bad kumjuh ia kitei ki surok namar ïa kitei ki surok ruh la shna da kajuh ka kompani. Balei tang namar ba ki trai ka kompani ki don ha ka sorkar ka sorkar kam nud ban ktah ïa ki namar ïoh khyllem sorkar ne ïoh jia kaba sngewsih ïa ka NPP? Ha ka jingshisha dei ban leh salonsar bad phah da ka jingtohkit ban lap ïa ki jingshisha baroh. Nalor kata wat la ka dei ka Company napoh ka jylla ruh haba ka jingtrei pat kam biang ka sorkar ka dei ban bishar bha nangne shakhmat ban aikam. Kam mut tang ba dei napoh ka jylla dei ban ïoh beit hynrei dei ban peit ïa ki kam ba ki trei ki ai jingshakri kumno ïa ki paidbah. Lada phai sha kine ki surok ki paidbah kiba ïaid lynti ki la shu ud namar jan manla u snem tang shu la slap ki la sniew beit katba kiwei kiwei ki surok ba shna da ki kompani ba nabar kim ju lei lei lada slap ruh ki dang biang bad dang neh beit.
Ka sorkar ka dei ban shim khia bad peitngor bha ban ai kam ïa ki kompani namar haba ki trei ïakino kino ki projek ki dei ban neh ym ban tor noh tang katto katne bnai.
