Nongstoiñ, Jymmang 24: Ka Hynñiewtrep Youth Council HYC Ri Muliang Circle, ha ka sngi nyngkong ka la ïoh ban pynskhem ïa ki ar tylli ki Unit, kawei ka Tynghor Area Unit bad kawei ka Nongsohram Unit.
Ha katei ka jingïalang la pynïaid da u Samla Shaiñborlin Syiemlieh GS HYC Ri Muliang Circle bad la ïoh ka jingkren na u Samla Banteilang Hoojon GS HYC Mawshynrut Circle, u ba la pynkynmaw ïa ka jingdonkam ban ïa tylli bad ïa burom markylliang.
U Samla Distarborlin Wanniang President HYC Ri Muliang, u la ong ba ka seng kan ïai tur shaphrang ïa ki kam pud u sam bad u la pynrem ïa ka Sorkar ba ka kheiñ kor ïa ka kam ïakhalai ban ïa ka rep Kwai.
U Samla Jerimaïa Dkhar President HYC Maweit Circle u la pynkynmaw ban ïakhun haduh ban da dep ïa kano kano ka kam bad u la ong kane ka thaiñ ka dei kaba donkam ban pynkhlaiñ ban ïoh trei ïa ka bha ka miat.
U Samla Readyfernandy Sun Organising ka HYC WKHD, u la ong ba ka HYC Ri Mulliang Circle, ka lah leh shibun ki kam na ka bynta ka jingbha ka thaiñ. U Samla Lumlang Kharsyiemlieh President HYC WKHD, u la ong ba long kaba sngew kmen ba da ki spah mynta ki la wan pynïasoh bad ka HYC. Kane ka paw ba ka seng ka la pyrshang ban trei shitom ban kyntiew ïa ka thaiñ.
“Ka thong ka HYC ka long ban ïakhun haduh da ïoh ILP. Ha u 2019 ka sorkar ka la mynjur hynrei kam poi ha ki skhor ka Sorkar India namar ba ka tlot ka Sorkar Jylla. Ngin ïai ïakhun ïa kane bad nga kitbok phi ki ar Unit phin ïai kiew shaphrang bad ngin ïarap ïa kiba jynjar, ngin ïarap ïa kiba donkam ban kyntiew ïa ka Jaitbynriew”, ong u samla Lumlang.
La pyntian smai ïa ki Nongkitkam da u Samla Lumlang Kharsyiemlieh President HYC WKHD. La sakhi ïaka jingïalang da ki Nongïalam ka District bad ka Circle. Ïa ka HYC Tyngjor Area Unit la ïalam da u Samla Victor Kharsyiemlieh bad kiwei bad ïa ka HYC Nongsohram Unit, la ïalam da u Samla Kalbert Samakha bad kiwei kiba la poi 70 ngut na kitei ki ar tylli ki Unit.
