Shillong, Jymmang 24: Ki nongïalehkai Judo ki la dawa na ka Meghalaya State Olympic Association (MSOA) bad Directorate of Sports and Youth Affairs ban sospon mardor ïa ka Meghalaya Judo Association. Ha ka kyrwoh khubor la ïathuh ba kum ki khynnah ïalehkai Judoka haba ki buddien ïa ka rukom treikam u Dipak Mallick ki la lap bad shem ba naduh u 2015 hadien ba la shimti President da u Bah Phrang R Bareh ba na Jokai, u Dipak Mallick u la pynïaid ïa kane ka Meghalaya Judo Association la kumba ka dei ka club shimet jong u.
“Naduh u 2015 ym ju don tournament kum ka State Level, School Level ne Inter District Level. Kumjuh u Dipak Mallick u ju ailad ewat da ki khynnah ba nabar jylla ban mihkhmat na ka Meghalaya Judo Association ha ki National Judo Championship da kaba pynduh lad ïa ngi ki khynnah trai jylla.” ong ki nongïalehkai.
Ki la kynnoh ruh ba ha ka jingpynïaid ki nongkitkam ba mynta ki shu khot meeting hi sop sop tang da u Dipak Mallick bad ki paralok jong u ba na Guwahati bad Delhi bad u la thung nongkitkam thymmai katba mon ma u da kaba pynkheiñ lut ïa ki kyndon ka rukom pynïaid Association bad mynta la ïohi da uwei u President ha ka jaka U Phrang R Bareh uba la shah jied kum U President ha u snem 2015.
“Bun na ki nongkitkam barim 2015 kim tip kumno ba la thung President thymmai mynta ha ka jaka U Phrang R Bareh ba la shah jied kum U President ha u snem 2015. Haba khot meeting ruh un khot tang ïa ki bar jylla kiba u thikna ba u lah ban pynkohnguh ïa ki katba u mon ban pynïaid ïa ka Meghalaya Judo Association. Halor kane ruh ngi pan jingshai na u Bah Phrang R Bareh ba mynno bad hangno phi la iehnoh kum u President Meghalaya Judo Association haba dei ma phi ba la shah jied ban long President ha u snem 2015. Mynta pat kynsan la mih da uwei u President Meghalaya Judo Association khlem da don ba tip lut da ki dkhot bad nongkitkam ka Meghalaya Judo Association jong u snem 2015 ter ter.”
Shuh shuh ki la ïathuh ruh ba hapoh ka jingpynïaid u Dipak Mallick shibun ki khynnah ïalehkai Judo ki la duh noh bun ki jingmyntoi kum ki Scholarship na SAI, National Tournament bad kiwei kiwei de. “Kumta lyngba kane ka khubor ngi dawa na ka Directorate of Sports & Youth Affairs bad Meghalaya State Olympic Association ban sospon noh ïa Ka Meghalaya Judo Association (MJA) kumba ka paw ba U Dipak Mallick u la leh hi ban pynïaid ïa ka Meghalaya Judo Association katba mon ma u,” ki la dawa.
“Ha ka juh ka por ngi dawa na ka Directorate of Sports & Youth Affairs Meghalaya ba dei ban phah pynphai noh ki pisa baroh ba ka MJA hapoh ka jingpynïaid u Bah Phrang R Bareh (President 2015) bad Dipak Mallick General Secretary ki la shim naduh u snem 2015 haduh mynta haba ki khlem leh eiei ïa ka Judo na ka bynta ka jingmyntoi ki khynnah ïalehkai Judo kumba ka la paw ha ki kotkhubor ha ka report jong ka MSOA ba la shah kynthoh ba ka Meghalaya Judo Association kam ju leh eiei ha ka Jylla ne shabar ruh na ka bynta ka Judo ha kine ki khyndiat snem ba la leit.” pynkut ka khyrwoh khubor.
