Ki jingkynnoh ki bym shisha ong u Marcuise, ujor sha ki bor ba dei peit ong u OC ïa u Tennydard

By Mawphor News Desk On Apr 29, 2023

Shillong, Iaiong 28 : U MLA jongka NPP na Williamnagar uba dei ruh u myntri sorkar u Marcuise N Marak u la pynpaw ba ki jingkynnoh bad ujor ejahar jong u Tennydard M Marak ïa u ba u pynkheiñ ïa ka Model Code of Conduct (MCC) ha ka por jongka election MLA 2023 ki long ki bym shisha bad ki bym don nongrim. Ha kajuh ka por na ka liang u OC jongka Williamnagar Police Station u la kyntu ïa u Tennydard ba un ujor sha ki bor ba dei peit ïa kane ka election ym sha ki pulit.
U Tennydard u la ujor FIR pyrshah ïa u Marcuise ha ka 4 tarik Iaiong da kaba kynnoh ba u pynkheiñ ïa ka Model Code of Conduct ha ka por election MLA da kaba sam ïa ki kot lyngkdop ne kaiphod treikam jongu ha ka por ba la pynbna ïa ka tarik jongka election MLA kata ha ka 3 tarik Rymphang 2023 katba ïa ka election hapoh ka jylla la dep pynbna naduh ka 18 tarik Kyllalyngkot 2023.
U Tennydard u la ujor ruh sha u Chief Election Commissioner (CEC) jongka India ha ka 23 tarik Lber 2023 bad phah kopi ruh sha u Myntri Rangbah duh ka ri u Narendra Modi, sha Myntri Kam pohïing ka ri bad kumjuh ruh sha u Chairman ka North East Democratic Alliance u Himanta Biswa Sarma. Ha katei ka shithi u la kyntu ïaki ba kin tuklar lem ïa ka kam beaiñ u Marcuise bad ban pynbna ruh ba ka jingjop jongu ka long ka bym lah ban ithuh.
Halor kane haba ïakren bad u Marcuise u la ong “Ki jingkynnoh u Tennydard ki long ki bym shisha bad ki bym don nongrim satia namar ka jingshisha ka long ba u dei u nongkyrshan ba radbah bad hakhmat eh jong uwei na ki kyrtong ba ïaleh pyrshah ïa nga uba wan ruh ha ka kyrdan kaba lai”
“ Dei ruh ma u (Tennydard) uba la leit kylleng ka constituency bad pynbna kaei kaba nga leh ha kine ki san snem na ka bynta ka constituency. Haba la ïoh sngew ïa kane ki paid nongkyrshan jong nga ki la wan bad kyntu ba nga dei ban pynmih ïa ka kaiphod treikam jong nga. Tang shu la pynmih ïa kane ka kaiphod u Tennydard um lah shuh ban thok bad ïalam bakla ïaki paidbah bad dei na kane ka daw ruh ba ki la rem kput da kaba tam ïa u kyrtong ba u kyrshan da palat 5000 vote bad na kata ka daw um lah ngeit bad lah ban pdiang ïa kane u sa ai da ka jingujor ka bym don nongrim. U la ong ruh haei kata ka Model Code of Conduct haba ïa ka result la dep pynbna?
U la ong shuh shuh ha ka kaiphod treikam ba la pynmih ym shym la thoh ne kyrpad ba ki paidbah kin jied ïa u. La shu pynmih ïa ka kaiphod khnang ba ki paidbah kin tip ïa ka jingshisha bad kin ym shah ïalam bakla.
Na ka liang u OC jongka Williamnagar Police Station mynta ka Sngi Thohdieng u la ai da ka jingthoh sha u Tennydard ba un weng noh ïa ka jingujor na Police Station bad ujor sha ki bor ba dei peit ne sha ka tnad election.
U OC u la pynpaw ha ka shithi ba hadien ba la ioh ka jingujor u la sdang ka jingtohkit ba malu mala halor kane ka jingkynnoh pyrshah ïa u Marcuise ba u la pynkeiñ ïa ka MCC.
La kdew shai ha ka Representation of Peoples Act 1951 bad Conduct of Election Rules 1961 ba dei u Returning Officer uba dei ban pdiang ïakiba kum kine ki jingujor bad uba lah ruh ban shim rai. Kumta halor kane ka nongrim u OC u kyntu ïa u Tnnydard ban weng noh ïa ka FIR bad ujor sha ki bor ba dei peit.