Shillong, ïaïong, 28: Ka 27 tarik Ïaiong 2023 kan long ka sngi ka ban sah jingkynmaw ïa ka lyngkhuh kaba 122 snem ka jingwan iuhkjat jong u Swami Vivekananda ha nongbah Shillong.
Ha kane ka sngi la rakhe ruh ïa ka sngi ba la seng ïa ka Ramakrishna Mission Vivekananda Cultural Centre.
La sdang ïa kane ka sngi da ka jingbuh syntiew ha u mot jong u Swami Vivekananda da u Lat ka jylla Meghalaya u Phagu Chauhan uba long kum u Kongsan ha ryngkat ka jingsakhi lang u Swami Achyuteshananda kum u symbud kongsan, Secretary jong ka Ramakrishna Mission u Narrotam Nagar, Arunachal Pradesh bad u Swami Hitakamananda, Secretary, Ramakrishna Mission, Shillong.
La sam ruh ïa ka Vivekananda Award of Excellence kaba long ka khusnam kaba kongsan la ai sha u Bah Sumar Sing Sawian na ka bynta ka jingnohsynniang kaba khraw jong u sha ka imlang sahlang jong ki Khasi bad ka Sangita Dey, ka nonghikai jong kane ka jaka ai jinghikai namar ka jingnohsynniang ba khraw jong ka sha ka Ramakrishna Mission Vivekananda Cultural Centre. Ka khusnam ka long da ka pisa bad ka Citation.
Ha ka por shiteng sngi jin ar hajar tam ki samla pule ki la ïashim bynta ha ki prokram ba la pynlong ha ki ar bynta, kaba mynstep bad ha ka por shiteng sngi.
U Lat ka jylla u Phagu Chauhan haba kren kum u Kongsan u la pynpaw da ka jingsngew burom ïa u Swami Vivekananda. U la sngewtynnad shisha ban pyrkhat ba u Swamiji u la ai jingkren na kane kajuh ka jaka ha u snem 1901. U la kren ruh shaphang ka jingnohsynniang jong u Swamiji sha ka pyrthei. Dei u Swami Vivekananda uba la pyni ba ka bor jong ka jingngeit niam bad jop ïa ka mynsiem jong ki briew kylleng ka pyrthei ha ka jingkren jong u ha Chicago.
U Swami Achyuteshanandaji haba kren kum u symbud kongsan u la ïathuh shaphang ki por ha u snem 1901 ha kane ka nongbah ha kaba ki surok ki long kiba khim bad ym shym la don ka bording elektrik hynrei u Swami Vivekananda uba dang kham khynnah bad uba dang don ka jingshitom u la wan sha kane ka jaka bad kane ka la ïalam sha ka jingseng jong kane ka jaka ai jinghikai kaba la don kti ha ka jingkyrshan ïa ki jingdonkam jong kane ka jylla.
U la ong kum ki tnat ba khlain jong u dieng ki donkam ïa u thied uba khlain, kumta ruh ka jingjop jong kane ka jaka ai jinghikai ka shong ha ka nongrim kaba khlain. U la ong ba 67 hajar ngut ki samla pule ki la ïoh jinghikai pyntbit na kane ka jaka ai jinghikai. U kyrmen ïa ka lawei kaba bha ha kaba ki nongshong shnong kiba hadien jong ka jylla ki ïoh ïa ka pule puthi kaba biang, ba kin lah ban jop ïa ki jingeh kiba mynta kiba long ka jingpang khuslai jingmut, ka jingsngewsih bad kiwei kiwei ki jingeh ba ïadei bad ka bor pyrkhat.
La pyllait ïa ka Magazine ha lai tylli ki ktien “Ka Jingshai – The Light Jyoti” Volume:4 issue:1, e-Zine da u Lat ka jylla.
La pynkup burom ruh ïa katto katne ngut ki briew ba synniang sha ka magazine ba kynthup ïa ki nongsaindur ba pawnam jong ka jylla kum u Bah Rafael Warjri, Prof. Streamlet Dkhar, Dr. Silbi Passah. La pynkup burom ruh ïa ki nonghikai kiba mynta bad kiba rim jong ka jaka ai jinghikai ha kane ka jingïalang.
Hadien kine ki jingïalang la pynbud pat da ki prokram tynrai ba ïadei bad ka deiriti jong ka ri, khamtam jong ka thaiñ Shatei Lammihngi jong ka ri.
