Shillong, Kyllalyngkot 18 : Ka National Peoples Party (NPP) ka la ther tyngeh ïa ka nongïalam jongka All India Trinamool Congress (AITC) ka Mamata Banerjee da kaba ong ba ki jingkular jongka mynta ka sngi ïa ki paidbah ha ka jingïalang ha North Garo Hills ki dei tang ki jingkular pynbieit election ïa ki paidbah.
Ka jingkob ba ka baaki ne credit card We Card bad MYE Card ki dei ki Card ban pynkhie im thymmai ka dei kaba shu kob khlem da peit ne ïohi jngai namar lada pyntreikam ïa kine ka jylla Meghalaya kan dap ram shirynjain artat kumba la jia ha West Bengal.
Ka NPP ka la ong ba ka WE Card Scheme ka dei tang ka kyrteng thymmai jongka Lakshmir Bhandar Scheme kaba pyntreikam ha West Bengal. Ka Per Capita Debt jongka sorkar AITC ha West Bengal ka long haduh 59,000 ha u snem 2022-23 bad kane ka jingkiew kane ka ram ka dei na ka daw jong kane ka skhim.Nalor kata ka hap ban siew ram haduh 80-000 haduh 90,000 klur kynthup ïak a sut man la u snem. Man la uwei pa kawei na ki nongshong shnong ha West Bengal ki hap ban siew ram 8000 tyngka shisnem. Kumta ka NPP ka kwah ban pynshai kdar sha ki paidbah ba kim dei ban shah riam ha kine ki buit sianti ka AITC kaba la shu kular khlem nongrim satia. Ka NPP ka la seng ïa ki nongrim ban kyntiew ïa ka jylla bad ïa ki nongshong shnong jongka bad kumta ki paidbah kim dei ban ngop ha kum kitei ki jingkular.
Ka ram ka shah jongka West Bengal mynta u snem 2022-23 ka lah ban kot sha ka 5.86 lak klur na ka 5.28 lak klur kat haduh ka 31 tarik u Lber 2022. Ka jylla West Bengal ka la ïaksaid bha mynta namar kane ka jingduna pisa tyngka bad ka la shem jingeh ban dang pynïaid shakhmat ïa kine ki skhim ruh bad ïa kiwei kiwei ki skhim ruh.
Da kane ka jingdap ram shirynjaiñ kaba la eh ïa ka West Bengal ban pynkhuid ïa kane ka ram, ka paw shai kdar mynta ba ka AITC Ka kwah ban pynngop ïa ka jylla Meghalaya ruh ban ngat ha kajuh ka apot bad ba ki paidbah ruh kin mad ïaki jingeh.
Kumta ka NPP kan ym shah da lei lei ruh ba ka AITC kan pynbieit ïa ki paidbah da kine ki jingkular thok jongka bad kan dang ïai sei madan shuh shuh ïa ki jingshisha.
Ka long ruh ka bym shai naei ka AITC kan wanrah pisa ban pyntreikam ïa kine ki skhim lane ka lah ban pynkylla ïa ka fund jongka Meghalaya sha West Bengal. Kane ka jingpynrung kyrteng ha kane ka skhim jongka AITC ka long ka ba la shu leh thok da ka I-PAC kaba dei ka agent kaba leit kylleng kylleng ban pynrung kyteng ïaki longkmie.
Kine ki skhim kin kot sha ka 2000 klur tyngka kaba long kumba 50% na ka jingpynlut jongka jylla. Kane kan ktah jur bha ïa ki kam pynroi pynpar, ïa ka rukom sam mar bam bad wat ïa ka tulop jong ki nongtrei sorkar ruh lada pyntrei ha jylla.
Mynta ka AITC ka kwah ban tyrwa ha ka jingphohsniew ïa ki paid nognshong shnong ka jylla namar wat u Dr Mukul Sangma ruh um shym lah ban leh ei ei ia ka jylla ha ka por ba u long u myntri rangbah.
Haba phai sha ka jingbym ïoh kam ïoh jam ha West Bengal ka dei ka jylla kaba wan ba ar ha ka ri ha ka jingbun ki bym ïoh kam khamtam ki kynthei khynnah kaba long kat kum ka Employment Exchange 2020 statistic. Ka West Bengal ka dang tam palat 24.6 lak ngut ki bym ïoh kam ban ïa ka jylla Meghalaya kata ïaki kynthei. Kat kum ka Employment Exchange statistic 2019 kiba bun eh ki bym ïoh kam ki dei ha West Bengal ba la poi haduh 77.6lak ngut.
Ka sorkar West Bengal ka la kam ba ka la thaw kam 10 million ki post hynrei kat haduh mynta ka kaiphod jongka Employment Exchange katei ka jylla ba ki don 3.5 million ki bym ïoh kam. Ka don kumba 2,00,000 tylli ki post ha ki kam sorkar jong ki tnad bapher bapher bad ki don .1.5 lak tylli ki post ba lait ha ki kam hikai. Kumba 1.3 million kiba thep aplikeshon na ka bynta ki kam clerk bad kim pat ïoh kam naduh u snem 2018. Ki don kumba 6 lak kiba la thep ïa ki post sub inspector bad inspectors kim pat shah khot interview haduh mynta.
Ka NPP ka la ong ba ka sorkar MDA hapoh ka jingïalam ka NPP ka la wanrah ka roi ka par ha ka jylla bad ka la thaw ruh ïa kiba bun ki polilsi bad prokram ban kyntiew ïa ka jylla.
Ka NPP ha kine ki san snem ka la trei borbah ban kyntiew ïa ka jylla bad ka jingpyntreikam ïaka skhim FOCUS bad FOCUS + ban ïarap ïa ki nongrep bad ki producers group ka la ai jingmyntoi bha ïa ki. Kiba bun ki la ïoh jnigmyntoi bha na kine ki skhim bad ki don haduh 4.5 lak ki nongrep ba la ïoh jingkyrshan na kine ki skhim. Ban ri jingri ka sorkar ka la ïarap ban ai haduh 10,000 tyngka. Ban kyntiew bad ai kam ïa ki samla la pyntreikam iaka skhim YESS. Kane ka skhim ruh ka la wanrah jingmyntoi bha ïa ki samla namar ki samla kiba don la ki kynhun kynhun treikam ki ïoh jingiarap haduh 1 lak tyngka bad kane ka la ïarap shi katdei eh ïaki khun samla ha ka jylla ban ïeng ha la ki jong ki kjat pynkut ka kyrwoh na ka NPP.
