Bym shet ne kylla nongrim haduh ba kut, pynkup burom ka PDF ïa ki arngut ki MLA

Shillong, K’lyngkot 18: Ka People Democratic Front (PDF) ha ka sngi Balang ha ka jingïalang ka Party kaba la pynlong ha Khasi National Durbar, Mawkhar, ka la pynkup burom ruh ïa ar ngut ki MLA jong ka party kiba la jop na ka party ha u 2018 bad kiba ïaineh bad ka bad pynkhreh ruh ban ïakhun biang ïa ka elekshon na kane hi ka party. Kine ki arngut ki MLA kiba ka party ka pynkup burom ki long u Bah Gavin M Mylliem MLA ka Sohra uba dei ruh u President ka Party bad ïa u Bah Banteidor Lyngdoh MLA na Mawkynrew uba dei ruh u Myntri Sorkar bad Working President ka party.
Ha kane ka sngi la wan shim bynta lang ruh da ki kyrtong jong ka party kiban ïakhun ha kane ka kynti na ka tiket jong ka PDF.
Haba kren ha kane ka sngi u kyrtong ka party na Nongkrem u Bah Egenstar Kurkalang u la ong ba ka jingïakhun na Nongkrem ha kane ka kynti kaba mynta kan dei hapdeng uta u heh spah da kaba kren pharshi sha u kyrtong ka NPP u Bah Dasakhiat Lamare bad ïa uta u heh tyngam uba pyntieng pynsyier ïa ki paidbah da kaba ong ba ka jaidbynriew ka don ha tmier ka riat kaba u pharshi sha u kyrtong ka VPP uba dei ruh u President kane ka party u Bah Ardent M Basaïawmoit.
“Ha kane ka kynti kaba mynta ka jingïakhun kan dei hapdeng jong nga ubas leh da ki kam ban shakri hok ïa ki paid Nongkrem pyrshah ïa u heh spah uba la theh pisa shibun bha ha nongkrem bad poyrshah ïa u heh tyngam uba ïaid kylleng ka ri ban pyntieng ïa ki paid ka ri ba ka jaidbynriew ka don ha tmir ka riat hynrei ubym leh eiei mynba u la jop la ar wat kum u MLA ka Nongkrem bad ngan dei u nongpynliem ïa kine ki ramhah ha kane ka kynti kaba mynta,” u la ong.
U la ong ruh ba ka jingdon kita ki High Level bad ki Low Level ka PDF kan pyndam lut hynrei kan wanrah ïa ka jinglevel ne jingïaryngkat ynda ka party kan ïalam ïa ka sorkar hadien ka elekshon.
U Bah Banteidor Lyngdoh, haba kynthoh halor ka jingphet noh ar ngut ki MLA kata u Bah Hamletson Dohling bad u Bah Jason S Mawlong, u la ong ba um lah sngewthuh ba ki ong ba lada ïaleh na ka PDF ruh jop hynrei lada ïaleh pat na ka NPP yn kham jop kham bun vote bad kaba ma ka long ba ïoh rem syndon ha kane ka elekshon.
Bah Gavin M Mylliem u la ong ba la ka long kumno kumno ruh dei ban skhem ka nongrim khnang ban nym ïalam bakla ïa ki paidbah. U la ong ba kum ka Party kam shym la shu mynjur lut ïa ki mat ïakren kiba la shim da ka Sorkar.
U la ong ruh ba ha kine ki snem kiba ka party a don ha ka sorkar MDA ka party ka la pyrshang ïa kaba bha tam ban shakri ïa ka jaidbynriew khmatam ïa ki paid nongrep ha kaba u Myntri sorkar uba na party u la pyrshnag dohïap dohim ban pynurlong ïa kiba bun bah ki mat kiba ka party ka kular ïa ki paidbah shuwa ka elekshon ha u 2018.
Ha kane ka sngi la ïoh ruh ka jingkren na kiwei pat ki kyrtong ka party kiba kynthup ïa u Bah Shemhok Garod, kyrtong na Raliang, u Bah Roswel Shadap, kyrtong na Mawhati bad kiwei kiwei de ki kyrtong.
Ha kane ka sngi la wan sakhi lang ruh da ki nongkitkam bad ki nongkyrshan ka party na kylleng ki bynta ka ri Khasi-Jaintia