Kam ka Mamata ba tang ka AITC kaba lah ban ai ïa ka sorkar ba shakri hok ha Meghalaya

Shillong, K’lyngkot 18 : Ka Chairperson ka All India Trinamool Congress (AITC) Mamata Banerjee mynta ka Sngi Balang kala ong ba tang ka party jong ka, kaba lah ban ai ïa ka Sorkar kaba shakri hok ïa ki paidbah ka Jylla Meghalaya.
Ka Banerjee ha ka jingleit ïuhkjat ha North Garo Hills, la pdiang sangewbha da ki hajar ngut ki briew kiba la ïalum paidbah ha madan Dilma Apal, Mendipathar.
Ka Banerjee kala ong “Nga wan hangne ban ïathuh ha phi ba ka TMC ka dei ka Party kaba tang ma ka, kaba lah ban ai ïa ka sorkar kaba shakri hok bad ïarap ban pynrulong ïa ka jingphohsniew ki samla, ki samla pule bad ki Kynthei. Nga ai ha ki Kynthei ïa ka Lakshmir Bhandaar. Hangne, ngan ai T.1000 sha ka Kynthei jong kawei pa kawei ka Longïing”.
Ha ka jingwan ïuhkjat jong ka ha Jylla ha u bnai Nohprah, ka Chairperson ka AITC kala pyllait paidbah ïa ka WE Card Scheme ba kular ban ai song jingïarap pisa sha ki kynthei ka Jylla Meghalaya kum ka jingpynkupbor ïa ki. Kane ka skhim kala ïoh ïa ka jingpynrung kyrteng palat 3.50 lak ngut haduh mynta.
Haba jer ïa ki jingbym lah treikam jong ka Sorkar MDA, ka Mamata kala ong “Kaei kaba ka Sorkar kala leh ha kine ki san snem? Nga kob ïa ki ban pyni ïa ka report card ïa kaei kaba kila leh ha kine ki san snem. Balei la bun tylli ki kam, ka bording kam shym la poi ha Meghalaya. Balei ba ki samla kim ïoh ïa ki lad ïohkam ïohjam”.
Haba kdew ïa ka jingaiti jong ka Meghalaya TMC ïa ka Jylla, ka Mamata kala kyrpad ïa ki paidbah “ban pynkup ïa ki briew, bat ïa ka deiriti, lehkmen ïa ka jinglong kyrpang ka Meghalaya”.
Haba ai khublei ïa ki paidbah halor ka jingshaniah ia ka jingïohi jngai jong ka Meghalaya TMC, u National General Secretary ka AITC ula ong “Haba peit ïa ka jingieid, ka jingïaroh, bad ka jingthrang jong ki paidbah, nga lah ban ong ba ka NPP kan nym ïoh jingjop wat tang shi seat na Ri-lum Garo”.
U Abhishek ula ong ba lada ka AITC ka shah jied ban ïoh bat ïa ka bor synshar, ki paidbah ka Jylla kin pynïaid ïa ka Sorkar ha Meghalaya, ym kum kito ki nongïalam kila pynïaid ïa ka Sorkar na ki ïingpaki dulan na Guwahati bad Delhi.