Resaiñ sa 5 ngut ki MLA kynthup u Myntri PHE, poi lut sha ktem UDP

Na ka 12 ngut, kob ban jop ar ne lai shah ki MLA ha u 2023

0

Shillong, K’Lyngkot 18 : Haduh san ngut ki MLA na ki party bapher bapher kynthup ïa u Myntri Sorkar ki la resaiñ hynne ka sngi bad tang hadien khyndiat kynta ki la pynïasoh lut sha ka UDP, kawei na ki seng riewlum kaba heh tam ha ka jylla bad kaba donlang ruh ha ka sorkar synrop jong ka Meghalaya Democratic Alliance.
Kitei kiba resaiñ hynne ka sngi ki kynthup ïa u MLA ka HSPDP na Mawkyrwat ba dei ruh u Myntri ka tnad PHE, Bah Renikton L Tongkhar, nangta u Bah Lambor Malngiang MLA shimet na Nongkrem, MLA ka Trinamool Congress na Sutnga-Saipung Bah Shitlang Pale bad arngut ki MLA ba shah sospon ha ka Congress ba kynthup ïa u Bah PT Sawkmie, MLA ka Mawlai bad MLA ka Nongpoh, Bah Mayralborn Syiem.
Ïa kitei baroh (lait noh u Bah PT Sawkmie) la pdiang burom sha ka party da u President rangbah ka UDP, Bah Metbah Lyngdoh ha ka jingïalang kaba la donlang naduh ki nongkyrshan haduh ki nongïalam ba hakhmat jong ka party.
Kumba long haduh mynta, ka UDP ka la dep ban pynbna haduh 40 ngut ki kyrtong na ki 60 tylli ki constituency kiba don ha ka jylla.
Haba kren ha katei ka jingïalang, u Bah Metbah u la ong ba mynta ka party kan leit sha ka elekshon da ki 12 ngut ki MLA, kata na ki 7 ngut ki MLA kiba la don lypa bad kitei ki san ngut kiba thymmai, kata khlem kynthup shuh ïa u Eugeneson Lyngdoh, MLA ka Mawphlang u bym shym la treh ban ïakhun biang.
“Kiba bun ki la buh jingkylli katno ngut ki MLA ba ka UDP kan jop hynrei nga nud ban ong ba katkum ka sorbe ba ngi la leh baroh 7 ngut ki MLA ka UDP kin jop biang bad ka sorbe ka ïathuh ruh ba kine ki san ngut kiba wan ïasoh mynta sha ka party ruh kin jop biang,” u la bynrap shuh shuh.
Da kaba kubur ïa ka jingkob jong u General Secretary ka Party, Dr. Jemino Mawthoh bad ruh ïa ka jingkren jong u Bah Renikton, u Bah Metbah u la ong ruh ba ki don beit ka jingsngew skhem ba kin poi beit sha ka thong namar na ki 12 ngut ki MLA kiba la jop ha u 2018, ka party ka don ruh bun ki MDC nalor ki MLA ba rim bad ki dur khmat thymmai kiban aireng mynta ka kynti.
Na ka liang u President u la ïathuh ruh ba ka party ka dang bishar ruh mynta sa ïa ka kyrteng jong ki 20 ngut ki kyrtong ha shwa ba kin pynbna ïa ka thup kaban wan. “Kum ka party ngi da bishar bniah ïa ki kyrtong khnang ban pyntikna ba ki paidbah kin hun shwa ba kin ai ïa ka rai.”
U ong ruh ba katei ka rai ba ki shim ka lah ruh ban pynsngewsih ïano ïano bad kumta kum ka party ki panmap namar ki kwah ba kaei ka rai ba ki shim kan dei kaba paka.
“Kat shaba ngi leit ki paidbah ki phai khmat sha ka party UDP namar ki ong ba dei tang ka UDP ha kane ka elekshon kaba mynta kaba i don ka jingkyrmen namar kat shaba ki phai ki ïohi ba ym poi shaei shaei ruh,” u la ong.
U President u la ong ruh ba dei hadien ki lai tylli ki elekshon shiteng samoi ba kum ka party ki la ïohi ba ki paidbah ka jylla ki la pyni ïa ka dak ba ki don ka jingshaniah ïa ka UDP kum ka party kaban ïalam noh ïa ka jylla.

Leave A Reply

Your email address will not be published.