Elekshon MLA-2023 : 27 tarik, Rymphang yn thep vote ka Meghalaya, 2 tarik Lber yn ñiew vote

0

Shillong, K’lyngkot, 18: Ka Election Commission of India (ECI) ha ka sngi Balang ka la pynbna ba ka sngi thep vote ban jied ïa ki nongmihkhmat ba thymmai sha ka Iingdorbar Thawaiñ ka Jylla Meghalaya kan sa long ha ka 27 tarik, Rymphang, 2023 bad ka jingñiew ïa ki vote kan sa long ha ka 2 tarik, Lber 2023.
U Chief Election Commissioner (CEC) u Rajiv Kumar, u la pyntip ba ka Jylla Meghalaya bad ka jylla Nagaland kin sa pynlong ha kajuh ka sngi ïa ka jingïathep vote kata ha ka 27 tarik Rymphang katba ha ka jylla Tripura yn sa pynlong ha ka 16 tarik u Rymphang.
Kine baroh lai tylli ki Jylla ki don mar 60 tylli ki Constituency. Ka sngi ban ñiew ïa ki vote ha baroh lai tylli ki Jylla kan long ha ka 2 tarik u Lber, 2023.
Ha Meghalaya bad Nagaland, ka sngi ban pynmih ïa ka jingpynbna (Notification) bad ban sdang thep kyrteng ka long ha ka 31 tarik, Kyllalyngkot bad ka sngi khatduh ban thep kyrteng kan long ha ka 7 tarik, Rymphang.
Ka sngi bishar ïa ki kyrteng jong ki kyrtong kan long ha ka 8 tarik, Rymphang bad ka sngi ba khatduh ïa ki kyrtong ban weng kyrteng kan long ha ka 10 tarik, Rymphang.
Katba ha Jylla Tripura, ka sngi pynmih ïa ka jingpynbna bad ban sdang thep kyrteng ki kyrtong kan long ha ka 21 tarik u Kyllalyngkot bad ka sngi thep kyrteng ba khatduh kan long ha ka 30 tarik Kyllalyngkot. Ka sngi bishar ïa ki kyrteng jong ki kyrtong kan long ha ka 31 taik Kyllalyngkot bad ka sngi ba khatduh ïa ki kyrtong ban weng noh ïa ki kyrteng kan long ha ka 2 tarik u Rymphang.
Ka ECI ka pynbna ba ka sngi thep vote ha Tripura kan long ha ka 16 tarik, Rymphang bad ka jingñiew ïa ki vote kan long ha ka 2 tarik, Lber.
U Chief Election Commissioner u la pynbna ba ka Model Code of Conduct (MCC) ka la treikam naduh kane ka sngi.

Leave A Reply

Your email address will not be published.