Nongpoh, Nailur 05: Ka eriong kaba jur ryngkat bad u slap u ba la ther mynta ka janmiet kala wanrah ka jingjulor kaba khraw ïa kawei ka shnong ha Ri-Bhoi haduh ba ki jingthung jingtep, ki post elektrik kila julor bad khyllem ha madan, kaba la pynlong ïaki shnong haka them Ri-Bhoi ban shongdum khlem bording.
Kane ka jingjia kala jia mynta ka janmiet haka por 4 baje eiei ha kaba kyndit kynsan ka eriong ryngkat u slap kila ther ha kylleng ki jaka jong ka dong Ri-Bhoi hynrei ka shnong Umdap Dumu kadei kawei naki shnong kaba la shah ktah jur naka jingkhyrwit ka lyer kaba jur.
Haba pyntip ïa katei ka jingjia u Bah Albert Maring uwei naki nongshong shnong katei ka shnong u la ïathuh haka jingther u slap ryngkat ka lyer kaba jur kala pynjulor bun ki jingthung jingtep naduh ki kwai, ki kait bad kiwei kiwei bad nalor ki jingthung bun tylli ki post elektrik kila khyllem ha katei ka shnong kaba kum ki paidbah ki hap ban shong dum wat sha kiwei kiwei ki bynta jong ka dong Ri-Bhoi bad donbok ba ha katei ka jingjia ym shym don ba mynsaw lane kano kano ka jingjia ba sngewsih.
