Shillong, Nailur 05 : U Myntri bad Nongpathai khubor ka Sorkar U Bah Paul Lyngdoh ha ka sngi Ba-ar ula ong ba kumba long mynta mynne, ka jinglong jingman ka suk ka saiñ ha Jylla ka dang long kaba biang bha.
Haba ïakren bad ki nongthoh khubor, u Bah Paul ula ong “Kyllum lang baroh, ngim pat shym la don kano kano ka jingpynthut kaba jur ïa ka shongsuk shongsaiñ hynrei khlem pep kin don beit hi ki jingjia ba jia hangne hangtai ïa kaba ym lah lait da lei lei ruh”.
Ula kyntu ruh ïa baroh ki kynhun ban wan sha ka miej ïakren ha ka jaka ban rah ïa ki jingeh bad jing sngewkhia jong ki sha surok.
“Nga kwah ban kyntu ïa baroh ba kin sngew laitluid bad lada phi don ïa kano kano ka jingeh ne jingsngewkhia ba phin wan sha ka miej jingïakren ka ban lah ban pynbeit ïa shibun kiei kiei ha ka jaka ban rah ïa ki sha surok bad pynthut ïa ka Nongbah baroh kawei” ong u Bah Paul.
Kane ka jingkynthoh jong u kala mih hadien ki jingkulmar kiba la jia na ka jingïakhih kaba mih pyrshah ïa ka jingthmu pynheh ka karkhana dewbilat ha East Jaintia Hills bad ka jingïakhih jong ka HITO ha Shillong.
