Hato ñion ki Pulit ïa ka HITO ba ka ïalap pyrshah ïa ka Sorkar ha ka elekshon MLA?: VPP

Shillong, Nailur 05: Hato ka Seng Hynniewtrep Integrated Territorial Organisation (HITO), ka shah ñion haduh katne katne ha ki Pulit dei namar ba ka la ïalap elekshon pyrshah ïa ka Sorkar MDA I ha kane ka elekshon MLA baladep?.
Kane kadei kaba la pynpaw da ka Seng Voice of the People Party (VPP) lyngba u nongai ktien jong ka, u Dr. Batskhem Myrboh.
“Ki Pulit ki la batai sla ïa ka aiñ tang ban ïoh pharep ïa ka HITO, namar ba ka HITO ka la ïalap ilekshon pyrshah ïa ka NPP ha ka ilekshon MLA baladep bad khamtam eh ïa u Symbud Myntri Rangbah”,la ong ka Kyrwoh jong ka VPP.
Ka Seng VPP ka pynrem jur ïa ka rukom treikam jong ka tnat kam pohïing kaba hap hapoh ka jingkhmih jong u Symbud Myntri Rangbah ka jylla. Ka rukom treikam ka pyni shai ba ka tnat ka kwah ban pynhiar kput ïa kito kiba ju wohnia ïa ka sorkar. Ka jingpynjari ïa ka khyrnit 171 bad 34 jong ka IPC bad kumjuh ruh ka khynrnit 105 jong ka Meghalaya Police Act 2010 pyrshah ïa ka HITO, ka pynpaw ïa ka jingpyndonkam bakla jong ki pulit ïa ka bor.
Ka Seng ka pynrem jur ruh ïa ka jingthombor jong ki pulit ïa ki paidbah baluilui myn ha ka 4 tarik Nailur, 2023 ha ka por ka jingïaid pyrshah sorkar ka HITO. Ka jingkawang ïa ki tiar pynsat khmat bad kiwei ka la pynjulor bad pynher mynsiem ïa ki riewpaidbah. Ka rukom leh jong ki Pulit ha Thangskai bad ha Shillong ka pynshynna ba ka tnat pulit ha Meghalaya ka long kaba tlot palat ka bym lah ban tehlakam wat tang ïa i jingïakhih iba rit eh.
Ka Seng ka dawa ruh ba dei ban ai jingpynsaja ïa kito ki Pulit kiba don kti ha ka rai ban thombor ïa ki paidbah bad kiba kren da ki ktien khlem akor ba sngew saitmet ha khmat ki paidbah. Kito kiba la mynsaw bad shah pynjulor ki mar ki mata ki dei ban ïoh ïa ka bai lutksan kaba dei biang na ka sorkar. U Symbud Myntri Rangbah, u dei ban shim ka jingkitkhlieh bad pynthikna ba ka tnat ka dei ban treikam katkum ki aiñ ha kata ka rukom ba kan ïahap dur bad ka riti synshar paidbah.