Ka RR Colony ka dei tang ka komiti kaba peit ïa ka bha ka miat ki bar jylla: Sanbor Shullai

Shillong, Nailur, 05: U MLA jong ka South Shillong Constituency u Bah Sanbor Shullai ha ka sngi Baar u la pynpaw ba ka Relief and Rehabilitation Colony Society, Rynjah ka dei tang ka komiti kaba peit ïa ka bha ka miat jong ki bar jylla kiba sah ha Rynjah.
Ha jingïakren bad ki lad pathai khubor u Bah Sanbor Shullai uba long teng u Executive Member jong ka Khasi Hills Autonomous District Council (KHADC) u la ong, “ki la khot ïa nga bad u Bah AL Hek. Ngi la leit. Nga kynmaw ba ngi la pyrshang ban ïapynbeit ïa kane ka kam da ka jingïasngewthuh jingmut hapdeng ka Dorbar Shnong bad ka Society.”
“Hynrei ngam tip balei ka HITO,” ong u Bah Sanbor haba kylli halor ka jingmih kane ka ishu mynta ka kynti.
“Ka Dorbar Shnong Rynjah nga tharai ka la mynjur bad ka KHADC ruh ka ladep ruh wat ïa ka Trading License sha ki nongkhaii ba dei hok kiba la aiti ïa ki kot ki sla kiba don ïa ki jingpynshisha. Halor ki kot ki sla ba la pynshisha, na ka syrnot sngi kha, ka kot khyndew bad kiwei kiwei, ka Dorbar Shnong ka la ai ïa ka No Objection Certificate (NoC) bad ka KHADC ruh ka la ai ïa ka Trading License sha ki nongkhaii bar jylla kiba dei hok,” u la ong.
Haba kylli, u Bah Shullai u la ong, ba ka RR Colony Society ka dei tang ka Welfare Committee kumba long ka Jhalupara Village Council kaba don ïa u Headman, ka Keatinge Road Welfare Committee ka don ïa u Headman, ka Oakland ruh ki don ïa u Headman.
“Ha ka shnong ka thaw ki ju ïatreilang bad ki Dorbar Shnong na ka bynta ka jingbha jong baroh ki nongshong shnong. Dei na kata ka daw, ki don baroh ki rekod kiba la ki ïarap ïa ka Dorbar Shnong kiba ju lum jingkheiñ bad ki jingtip kiba bniah ïa ka kyrteng jong ki nongshong shnong (bar jylla) ïa kiba la aiti sha ka Dorbar Shnong.